जेठ ३२ धनगढी । कैलालीमा यस वर्ष ७९ हजार ३ सय ८५ मेट्र्कि टन आलु उत्पादन भएको छ । कृषि ज्ञान केन्द्र कैलालीका अनुसार आर्थिक वर्ष २०८०÷८१ मा ५ हजार २ सय ६५ हेक्टर क्षेत्रफलमा आलुखेती गरिएकोमा ७९ हजार ३ सय ८५ मेट्रिक टन आलु उत्पादन भएको हो । यस वर्ष हिउँदे आलु ४ हजार ५ सय ८० हेक्टर क्षेत्रफलमा लगाइएकोमा ७२ हजार १ सय ३० मेट्रिक टन उत्पादन भएको छ भने वर्षे आलु ६ सय ८५ हेक्टर क्षेत्रफलमा लगाइएकोमा ७ हजार २ सय ५५ मेट्र्कि टन उत्पादन भएको छ ।

गत वर्षको तुलनामा यो वर्ष आलु उत्पादनमा वृद्धि भएको छ । कृषि ज्ञान केन्द्रको तथ्याङक अनुसार गत आर्थिक वर्ष २०७९÷८० मा ७५ हजार २० मेट्रिक टन आलु उत्पादन भएको थियो । जुन यो वर्ष भन्दा ४ हजार ३ सय ६५ मेट्रिक टनले कम हो । गत वर्ष हिउँदे आलु ६७ हजार ७ सय ६० मेट्रिक टन र वर्षे आलु ७ हजार २ सय ६० मेट्रिक टन उत्पादन भएको थियो । यो वर्ष आलुको उत्पादनसँगै खेती गरिने क्षेत्रफलमा पनि वृद्धि भएको पाइएको छ ।

गत वर्ष ५ हजार २ सय हेक्टर क्षेत्रफलमा आलुखेती गरिएकोमा यस वर्ष ५ हजार २ सय ६५ हेक्टर क्षेत्रफलमा आलुखेती गरिएको थियो । यस वर्ष आलुखेती गरिएको क्षेत्रफल ६५ हेक्टरले बढी देखिएको छ । गत वर्ष हिउँदे आलु ४ हजार ५ सय १२ हेक्टर क्षेत्रफलमा लगाइएको थियो भने वर्षे आलु ६ सय ८८ हेक्टर क्षेत्रफलमा लगाइएको थियो । कृषि ज्ञान केन्द्रका सूचना अधिकारी श्यामराज जोशीले यस वर्ष हिउँदमा कुहिरो कम लाग्दा पनि आलु उत्पादनमा वृद्धि भएको बताए ।

यस वर्ष मौसमले साथ दिएको बताउदै उनले हिउँदमा कुहिरो पनि कम लागेको बताए । गोदावरीतिरका किसानहरुले पनि आलुखेती गरिरहेको बताउदै उनले यस वर्ष आलु लाउने किसान पनि बढेको बताए । सूचना अधिकारी जोशीका अनुसार बढीजसो कैलालीको घोडाघोडी नगरपालिकाका किसानहरुले आलुखेती गर्ने गरेका छन् । त्यसपछि गोदावरी, गौरीगंगा अनि लम्कीचुहा र टीकापुरका किसानहरुले पनि आलुखेती गर्ने गरेका छन्, । कैलालीमा उत्पादित आलु बुटवल पठाइने गरेको सूचना अधिकारी जोशीले बताए ।