जेठ २४ धनगढी । सशस्त्र प्रहरी बलसहितको सरकारी टोलीले चीनको स्वशासित क्षेत्र तिब्बतसँग सिमाना जोडिएको उरै नाकाको निरीक्षण गरेको छ । सशस्त्र प्रहरी बल नेपालका प्रहरी नायब उपरीक्षक जनकराज पन्त, साइपाल गाउँपालिकाका उपाध्यक्ष डोल्मा तामाङ सहितको टोलीले उरै नाकाको निरीक्षण गरेको हो ।
साइपाल गाउँपालिकाका उपाध्यक्ष डोल्मा तामाङले तीन दिनको पैदल यात्रा गरेर टोली उरै नाका पुगेको जानकारी गराउदै पाँच हजार दुई सय मिटर उचाइमा रहेको २ नम्बर पिलर र आसपास क्षेत्रको अनुगमन गरिएको बताइन् । टोलीमा छ जना सरकारी कर्मचारी, साइपालको काँडा र धुली प्रहरी चौकीबाट पाँच जना नेपाल प्रहरी र सशस्त्र प्रहरी बलका सुरक्षाकर्मीसहित १८ जना सहभागी भएको उनले जानकारी गराईन ।
बझाङका प्रमुख जिल्ला अधिकारी विश्वामित्र कुइँकेलले आगामी असार १६ गतेदेखि उरै नाका पूर्णरूपमा सञ्चालनमा आउने बताउका छन । नाका खुलेपछि व्यापार–व्यवसायका निम्ति सीमापारि जान हालसम्म पाँच जनाले अनुमतिपत्र लिएको उनले जानकारी गराए ।
नेपाल र चीन सरकारबीच चीनसँगका १४ वटा नाका क्रमशः खोल्न सहमतिभएसँगै यही जेठ १२ गते तिब्बतको सिगात्सेको चेन्टाङमा आयोजित कार्यक्रम मार्फत उपप्रधानमन्त्री एवं परराष्ट्रमन्त्री नारायणकाजी श्रेष्ठ र चीनको स्वशासित क्षेत्र तिब्बतका उपाध्यक्ष सिलाङ निमाले संयुक्त रूपमा नाका पुनःसञ्चालनको घोषणा गरेका थिए ।
