जेठ २० बैतडी । बैतडीमा हावाहुरीले लिफ्ट खानेपानीको सोलारपाता उडाएको छ । शनिबार दिउँसो आएको हावाहुरीले पाटन नगरपालिकामा रहेको पाटन लिफ्ट खानेपानी योजनाको सोलारपाता हावाहुरीले उडाएको हो ।
हावाहुरीले नगरपालिकाको वडा नम्बर १ गेरुवापानीको मुहानमा राखिएको सोलारपाता ककउडाएको बताईएको छ । हावाहुरीले खानेपानीको सोलारपाता उडाउदा सो वडाको गणेशपुरक्षेत्रमा खानेपानीको समस्या भएको खानेपानी उपभोक्ता समितिका अध्यक्ष चन्द्रदेव भट्टराईले बताए ।
त्यस्तै ३ ओटा विद्यालय, अस्थायी प्रहरी पोष्ट बयलचौरा, बयलचौरा बर्थिङ सेन्टरमा समेत खानेपानीको आपूर्ती बन्द भएको बताईएको छ । हावाहुरीले खानेपानी तान्नका लागि राखिएका ७५ ओटा सोलार पातामध्ये ३० ओटा उडाएर काम नलाग्ने बनाएको अध्यक्ष भट्टराईले बताए । हावाहुरीले सोलारका पाता उडाए पछि १५ लाख बढीको क्षति भएको अनुमान गरिएको छ ।
पाटन लिफ्ट खानेपानी योजना मार्फत १ सय १९ घरधुरीमा खानेपानी आपूर्ती हुँदै आएको छ । खानेपानी तथा सरसफाई डिभिजन कार्यालय मार्फत गत असारमा मात्रै सम्पन्न भएको योजनामा क्षति पुगेपछि स्थानीयहरुलाई खानेपानीको समस्या भएको छ ।
