जेठ १८ धनगढी । सुदूरपश्चिम प्रदेशमा आगलागीका घटनाबाट करोडौको क्षती भएको छ । विभिन्न समयमा भएका आगलागीका घटनाबाट करोडौको क्षती भएको हो ।
बुधबार मात्र कैलालीको गोदावरी नगरपालिका वडा नम्बर–६ लालपुरमा आगलागी हुँदा ३ वटा पसलमा क्षति भएको छ । लालपुर चौराह नजिकै रहेको न्यू भुवन हार्डवेयर, भैरव एग्रोभेट र एमजे जुत्ता पसलमा आगलागी भएको हो । आगलागीबाट करिब साढे ४२ लाख बराबरको क्षति भएको इलाका प्रहरी कार्यालय मालाखेतीका प्रहरी नायब उपरीक्षक (डिएसपी) गंगबहादुर थापाले जानकारी गराए ।
आगलागी भएको न्यू भुवन हार्डवेयरमा सबैभन्दा बढी क्षति भएको छ । आगलागीबाट न्यू भुवन हार्डवेयर भने जलेर पुरै नष्ट भएको प्रहरीले जनाएको छ । नजिकै भएकाले अन्य पसलहरुमा भने आंशिक क्षति पुगेको उनले बताए । बुधबार दिउँसो लागेको आगो दमकल, प्रहरी र स्थानीय मिलेर निभाएका थिए । आगो नियन्त्रणमा लिन इलाका प्रहरी कार्यालय मालाखेतीबाट प्रहरी नायव उपरीक्षकको कमाण्डमा ११ जनाको प्रहरी टोली खटिएको थियो ।
विहिबारसम्म सुदूरपश्चिम प्रदेशमा आगलागीका दुई सय ३४ घटना घटेका छन् । ती घटनामा परी ७ महिला र ४ जना पुरुष गरी ११ जनाको मृत्यु भएको छ । १२ जना पुरुष र १६ जना महिला गरी २८ जना घाइते भएका छन । आगलागीबाट दुई सय ६२ परिवार प्रभावित भएका छन । २५ वटा घरमा पूर्ण र ३६ वटा घरमा आंशिक क्षति पुगेको प्रहरीले जनाएको छ ।
६७ वटा गोठमा आगलागी हुँदा ९३ वटा पशु चौपायाको क्षति भएकोे सुदूरपश्चिम प्रदेश आपतकालिन कार्य सञ्चालन केन्द्र धनगढीले संकलन गरेको विवरणमा उल्लेख गरिएको छ । सुदूरपश्चिम प्रदेशमा २९ वटा वन जंगलमा समेत आगलागी भएको छ भने आगलागीका घटनाबाट २३ लाख ६० हजारको क्षति भएको विवरणमा उल्लेख गरिएको छ ।
