जेठ १४ धकञ्चनपुर । कञ्चनपुरको शुक्लाफाँटा नगरपालिका वडा नम्बर–४ का किसानलाई सिँचाइ सुविधा प्रदान गर्नका लागि चालु आर्थिक वर्षमा ५० प्रतिशत अनुदानमा १३ वटा स्यालोट्युबवेल जडान गरिएको छ । किसानलाई समूहमा आबद्ध गरी १३ वटा स्यालोट्युबवेल जडान गरिएको हो । वडाध्यक्ष कमल ठकुल्लाले एक समूहमा २० देखि २५ जना किसान आबद्ध रहेको जानकरी गराउदै दातृ निकायबाट छ वटा, वडा कार्यालयबाट पाँच वटा र नगरपालिका कार्यालयको कृषि शाखाबाट दुई वटा गरी १३ वटा स्यालोट्युबवेल जडान गरिएको जानकारी गराए ।
ट्युबवेल जडानका लागि कुल लागतको आधा खर्च समूहले र आधा खर्च वडा, नगरपालिका र दातृ निकायले व्यहोरेको उनले बताए । स्यालोट्युवेल जडान भए पछि १० बिघा खेतमा सिँचाइ सुविधा उपलब्ध भएको उनले जानकारी गराए । स्थानीय किसान परमानन्द अवस्थीले खेतमा सिँचाइको सुविधा नहुँदा आकासे पानीको भरमा खेती गर्नुपर्ने बाध्यता रहेको बताउदै स्यालोट्युबवेल जडान गरिए पछि समयमै धानको बीउ छर्न पाएको बताए । रोपाइँ पनि समयमै हुने भएकाले धानको उत्पादन अरु वर्षको तुलनामा बढी हुनेमा ढुक्क भएको उनले बताए ।
स्यालोट्यबवेल जडान भएका केही किसानले यस वर्षदेखि नै व्यावसायिक रुपमा तरकारी खेती गरेकोे वडा सदस्य मनिदत्त पन्तले बताए । असैना लगायत क्षेत्रका किसानले तरकारी खेतीसँगै वसन्ते मकैखेती गरेर आम्दानी लिन थालेको बताउदै उनले सिँचाइ सुविधा भए पछि केही किसानले उखुखेती समेत गर्न थालेको बताए । किसानलाई व्यावसायिक कृषितर्फ डो¥याउनका लागि वडा कार्यालयले आगामी आर्थिक बर्षका लागी प्रविधि हस्तान्तरण, बीउ, मल लगायतमा अनुदान दिने कार्यक्रम सञ्चालन गर्ने उनले जानकारी गराए ।
