जेठ ०७ बैतडी । बैतडीको पुर्चाैडीलाई क्षयरोग मुक्त बनाउन अभियान सञ्चालन गरिएको छ । पुर्चाैडी नगरपालिकालाई क्षयरोग मुक्त बनाउन अभियान सञ्चालन गरिएको हो । नगरपालिकाका स्वास्थ्य शाखा प्रमख सुरेन्द्र अवस्थीले क्षयरोगमुक्त नेपाल अभियानलाई सार्थकता प्रदान गर्न पालिकामा पनि अभियान सञ्चालन गरिएको बताए ।
उनले अभियान अन्तर्गत वडास्तरीय योजना तर्जुमा गर्ने काम भईरहेको बताउदै अहिले वडाहरुमा खकार संकलन र परीक्षण शिविर सञ्चालन भईरहेका बताए । उनका अनुसार हालसम्म ६ ओटा वडाहरुमा खकार संकलन र परीक्षण शिविर सम्पन्न गरि सकिएको छ । बाँकी रहेका वडाहरुमा केही दिनभित्रै शिविर सञ्चालन हुने उनले जानकारी गराए ।
अभियान अन्तर्गत प्रत्येक वडाहरुमा स्वयंसेवक छनौट गरेर परिचालन गरिएको अवस्थीले बताए । स्वयं सेवकहरुलाई पनि तालिम दिएर क्षयरोगका बिरामीहरुको खोज पडताल भइरहेको उनले बताए । अहिलेसम्म सञ्चालन भएका शिविरबाट एकजनामा क्षयरोग पत्ता लागेको स्वास्थ्य शाखा प्रमुख अवस्थीले बताए ।
जिल्लामा १ सय ७ जना क्षयरोगका बिरामीहरु उपचारमा रहेकोमा पुर्चौंडीका १८ जना रहेको उनले बताए । नेपाल सरकारले सन् २०३५ सम्ममा क्षयरोग नियन्त्रण र सन् २०५० सम्म क्षयरोग उन्मूलन गर्ने लक्ष्य लिएको जानकारी गराउदै उनले लगातार दुई हप्ता भन्दा बढी समय सम्म खोकी लाग्ने, खानामा रुचि नहुने, दुब्लाउँदै जाने र कमजोर हुनु क्षयरोगका लक्षण भएको बताए । यस्ता लक्षण देखिएमा नजिकको स्वास्थ्य संस्थामा चेकजाँच गराउन उनले आग्रह गरेका छन् ।
