जेठ ०५ धनगढी । कैलालीको गौरीगंगा नगरपालिकाले मापदण्ड विपरीत नदीजन्य पदार्थको दोहन गर्दै आएको छ । गौरीगंगा नगरपालिका वडा नम्बर–३ शिवगंगा नदीमा डोजर लगाएर नगरपालीकाले नदीजन्य पदार्थको दोहन गर्दै आएको हो । नगरपालिकाले डोजर र से १ ग १२४ र से १ ग १२५ नम्बरको टिप्पर प्रयोग गरेर मापदण्ड विपरीत नदीजन्य पदार्थको दोहन गर्दै आएको पाईएको हो । वडा नम्बर ३ को कार्यालयले ग्राभेलका लागि महेन्द्र राजमार्गको शिवगंगा पुल देखि पाँच सय मिटर दक्षिणबाट नदीजन्य पदार्थ उत्खनन् गर्ने काम गर्दै आएको छ ।
वडा नम्बर ३ का सडकहरूमा ग्राभेल गर्न थालिएको वडासदस्य स्थानीय हरिराम आर्चायले बताए । उनले वडाका सडकहरूमा ग्राभेल गर्न हतार–हतारमा काम गरि रहेको बताए । महेन्द्र राजमार्गबाट पाँच सय मिटर तल खन्न पाउने भनिएकाले आफुले खन्न भनेको उनले बताए ।
सङ्घीय मामिला तथा सामान्य प्रशासन मन्त्रालय अन्तर्गतको वातावरण तथा विपद् व्यवस्थापन शाखाले जिल्ला समन्वय समितिहरू र स्थानीय तहहरूलाई पठाएको मापदण्ड विपरीत गौरीगंगा नगरपालिकाले नदीजन्य पदार्थको दोहन गर्दै आएको छ ।
ढुङ्गा, गिट्टी, तथा बालुवा उत्खनन्, बिक्री तथा व्यवस्थापन सम्बन्धी मापदण्डको दफा ४ (१०) मा घना बस्ती र वन क्षेत्रको २ किलोमिटर, राजमार्गको पाँच सय मिटर दूरी भित्रको नदी, सडक पुल तथा झोलुङ्गे पुलको एक किलोमिटर तल र पाँच सय मिटर माथिको नदीजन्य पदार्थ उत्खनन् र सङ्कलन गर्न नपाइने उल्लेख गरिएको छ । गौरीगंगा नगरपालिकाले शिवजगंगा नदीको सडक पुलबाट पाँच सय मिटर तल डोजर प्रयोग गरेर नदीजन्य पदार्थ उत्खनन् गर्दै आएको छ । कैलालीका प्रमुख जिल्ला अधिकारी धमेन्द्रकुमार मिश्रले नदीे सङ्कलनको जिम्मा स्थानीय सरकारको भएको बताए ।
स्थानीय तहहरूले नदीजन्य पदार्थको सङ्कलन गर्नु पर्ने बताउदै मापदण्ड विपरीतको काम नहुनु पर्ने बताए । के भएको रहेछ ? प्रहरीलाई पठाएर बुझने उनले बताए । जिल्ला समन्वय समिति कैलालीका कार्यवाहक प्रमुख खगराज भुषालले गौरीगंगा नगरपालिकाका नगर प्रमुख देविदत्त कडेललाई फोन गरेपछि डोजर सहितका टिप्पर पुलबाट एक किलोमिटर तलको दुरीमा लगिएको बताएका छन । नगर प्रमुख कडेलले वडाका जनप्रतिनिधिहरू, डोजरका चालक र टिप्परका चालकहरूलाई मापदण्डको विषयमा जानकारी नभएकाले यस्तो भएको बताएको उनले बताए । उहाँहरूले पुलबाट पाँच सय मिटर तल सोच्नु भएको रहेछ ।
पाँच सय मिटर जतिमा खन्नु भयो । मलाई जानकारी भए पछि एक हजार मिटरमा पठाएको उनले बताए । पुलबाट माथि पाँच सय मिटर र तल एक किलो मिटरमा खन्न नमिल्ने भनेर भनेको उनले बताए । नदीको सतह तल गएकाले शिवगंगा नदीको पुल भासिए पछि सडक डिभिजन कार्यालयले मर्मत गरेको थियो ।
