जेठ ०५ बैतडी । बैतडीमा मनसुनजन्य विपद्का घटनाबाट बच्न विपद प्रतिकार्य योजना तयार गरिएको छ । विपद् पूर्व र विपद् पश्चात् गर्ने काम समेटेर जिल्ला विपद् व्यवस्थापन समिति बैतडीले प्रतिकार्य योजना तयार गरेको हो ।
विपद् व्यवस्थापन समितिको बैठकबाट योजना पारित गरिएको प्रमुख जिल्ला अधिकारी एवं जिल्ला विपद् व्यवस्थापन समितिका संयोजक भीमकान्त शर्माले जानकारी गराए ।
उनले विपद प्रतिकार्य योजनामा पुसदेखि हाल सम्म जिल्लामा विभिन्न विपदका घटनामा भएको क्षतिको मूल्याङ्कन गर्दै राहत मापदण्ड अनुसार विपद् प्रभावित व्यक्ति तथा परिवारहरूलाई राहत उपलब्ध गराइने बताए । उनले आगोले जलेर घाइते भएका २ जना, आगलागी भई घरमा क्षति भएका २ परिवार र रुख ढलेर घर भत्केका ३ परिवारलाई राहत दिने निर्णय गरिएको बताए ।
मानवीय तथा प्राकृतिक कारणले आगलागीका घटना बढ्नुका साथै अव्यवस्थित सडकहरूले सडक दुर्घटना, बाढी, पहिरो लगायतका विपद्को जोखिम कायम रहेको उनले बताए ।
