जेठ ०५ कञ्चनपुर । २०४२ साल देखि निर्माण सुरु गरेर सुस्त गतिमा काम भइरहको कञ्चनपुरको दैजी र डडेल्धुराको जोगबुडा जोड्ने सडकखण्ड निर्माणका लागि विनियोजन गरिएको ३० करोड बजेट ‘फ्रिज’ हुने अवस्था आएको छ । चालु आर्थिक वर्षमा संघीय सरकारले वैकल्पिक सहायक राजमार्ग विकास कार्यक्रम अन्तर्गत उक्त सडक खण्डका लागि बजेट विनियोजन गरे पनि हालसम्म ठेक्का आह्वानको प्रक्रिया समेत शुरु नभए पछि ३० करोड बजेट ‘फ्रिज’ हुने अवस्था आएको हो ।
उक्त सडक खण्डमा प्रदेश सरकार अन्तर्गत पूर्वाधार विकास कार्यालयबाट ठेक्का सम्झौता जारी भएकाले पूरक ठेक्का आह्वान गर्न नसकिने अवस्था हुँदा बजेट फ्रिज जाने सडक विभाग कार्यालय डोटीका सूचना अधिकारी रामचन्द्र जोशीले जानकारी गराए । उनले चालु आर्थिक वर्षमा ३० करोड बजेट विनियोजन गरिएको बताउदै प्रदेशको ठेक्का पहिल्यै देखि कायम रहेकाले पूरक ठेक्का आह्वान गर्न नसकेको बताए । साइट प्याक भएकाले हाम्रो तर्फबाट बजेट फ्रिज भएको विवरण पठाउउने उनले जानकारी गराए ।
अरु योजनामा रकमान्तर गर्ने विषय सम्बन्धित मन्त्रालयकै हातमा हुने बताउदै उनले सुदूरपश्चिमका सात वटा पहाडी जिल्ला जोड्न भीमदत्त राजमार्गको विकल्प मानिएको दैजी–जोगबुडा सडकखण्ड अन्तर्गत दुई खण्डमा निर्माण जारी रहेको छ । २०७४ सालमा दुई खण्डमा ठेक्का आह्वान गरेर काम भइरहेको बताईएको छ । तर अहिले दुवै खण्ड अलपत्र रहेको बताईन्छ । दैजी–लिपना खण्डमा १३ किलोमिटर सडकमा नार्गाजुन कन्स्ट्रक्सनले २१ करोड रुपैयाँमा निर्माणको जिम्मेवारी पाए पनि काम कछुवा गतिमा काम भई रहेको छ ।
आठ किलोमिटर सडक कालोपत्र भए पनि केही वर्षअघि पहिरोले सडकसँगै नाली, तारजाली पछि अहिले बजेट अभावमा काम सुस्त गतीमा भई रहेको छ । जोगबुडा–लिपना खण्डको अवस्था पनि उस्तै रहेको छ । २०७४ सालमै राजेन्द्र शर्मा जेभीसँग २१ करोड ३६ लाखमा २०७७ सालमै काम गर्नेगरी ठेक्का सम्झौता भएको भए पनि दोस्रोपटक थपिएको म्याद गत वर्ष असारमै सकिएर २०८२ असार मसान्त सम्म तेस्रोपटक म्याद थप भएको छ ।
