जेठ ०१ कञ्चनपुर । सुदूरपश्चिम प्रदेशका दुई वटा जिल्ला कैलाली र कञ्चनपुरका तीन वटा पालिकामा फोहर व्यवस्थापन प्रशोधन केन्द्र निर्माणकार्य जारी रहेको छ । एसियाली विकास बैंक (एडिबी) को सहयोगमा कैलालीको धनगढी उप–महानगरपालिका, गोदावरी नगरपालिका र कञ्चनपुरको शुक्लाफाँटा नगरपालिकामा फोहर प्रशोधन केन्द्र निर्माण कार्य जारी रहेको हो । क्षेत्रीय सहरी विकास आयोजना कार्यान्वयन इकाई धनगढीका आयोजना कार्यान्वयन इकाई इन्जिनियर सञ्जीव शाहले तीनवटै पालिकामा फोहरमैला प्रशोधन केन्द्र निर्माणको काम जारी रहेको जानकारी गराए ।
गोदावरी नगरपालिकामा निर्माणाधीन प्रशोधन केन्द्रको ८१ दशमलव ५ प्रतिशत भौतिक प्रगति भइसकेको बताउदै उनले उक्त प्रशोधन केन्द्रको निर्माण दुई वर्षमा सक्ने लक्ष्य सहित सिचुवान–प्रोभिन्स, जिवोलोजिकल इञ्जिनियरिङ कम्पलेक्स कम्पनी लिमिटेडले काम गरिरहेको जानकारी गराए । ५२ करोड ४८ लाखमा निर्माण भइरहेको प्रशोधन केन्द्र निर्माण पछि अत्तरिया बजारसहित पालिकाको फोहर व्यवस्थापनमा सहज हुने उनले बताए ।
त्यसैगरी धनगढी उप–महानगरपालिका वडा नम्बर–७ पटेलास्थित सामुदायिक वनको जग्गा प्राप्ति पछि प्रशोधन केन्द्र निर्माणको काम सुरू भएको इञ्जिनियर शाहले जानकारी दिए । “रुख कटान गर्न प्रक्रियागत कारणले केही ढिलाइ भए पनि अहिले सबै प्रक्रिया पूरा गरेर निर्माणस्थलमा रुख कटानको काम भइरहेको उनले जानकारी गराए । धनगढीमा पनि सोही चिनिया कम्पनीले दुई वर्षमा काम सक्ने गरी ८८ करोडमा ठेक्का पाएको उनले जानकारी गराए ।
त्यसैगरी कञ्चनपुरको शुक्लाफाँटा नगरपालिका वडा नम्बर–११ मा निर्माणाधीन प्रशोधन केन्द्रमा पनि ५० प्रतिशत कार्य सम्पन्न भइसकेको उनले जानकारी गराए । ३० करोड २५ लाखमा रमन–केएस जेभीले निर्माण कार्य गरिरहेको र बीस महिना भित्र कार्य सम्पन्न गर्ने सम्झौता रहेको इञ्जिनियर शाहले जानकारी गराए । एडिबीले सुदूरपश्चिमका चार वटा सहरमा सडक पूर्वाधार स्तरोन्नति सहित आधुनिक सडक निर्माणमा सहयोग गरिरहेको उनले जानकारी गराए ।
धनगढी उप–महानगरपालिका, गोदावरी नगरपालिका, शुक्लाफाँटा नगरपालिका र भीमदत्त नगरपालिकालाई आधुनिक सहर बनाउने योजना सहित बजार क्षेत्रको पूर्वाधार निर्माण भइरहेको उनले बताए । कञ्चनपुरको भीमदत्त नगरपालिकाले फोहरमैला प्रशोधन केन्द्रका लागि जग्गा उपलब्ध गराउन नसकेका कारण काम सुरु नभएको उनले बताए ।
शुक्लाफाँटा नगरपालिकाका नगरप्रमुख रणबहादुर महराले फोहरमैला व्यवस्थापन केन्द्र निर्माण भए पछि नगरको फोहर व्यवस्थापनमा सहयोग पुग्ने बताए । उनले प्रशोधन केन्द्रमा स्वास्थ्यजन्य फोहरका लागि प्लान्ट थप्ने विषयमा पहल भइरहेको उनले जानकारी गराए ।
