बैशाख २७ बैतडी । बैतडी– जिल्ला अस्पताल बैतडीमा कार्यरत चिकित्सक र स्वास्थ्यकर्मीहरुले आकस्मिक बाहेकका सबै सेवा बन्द गर्ने चेतावनी दिएका छन् । काम गरेको अतिरिक्त भत्ता नपाएको भन्दै आन्दोलित उनीहरुले आकस्मिक बाहेकका सबै सेवा बन्द गर्ने चेतावनी दिएका हुन ।
अस्पतालमा कार्यरत चिकित्सक र स्वास्थ्यकर्मीहरुले बुधबार विज्ञप्ति जारी गर्दै अतिरिक्त समय र सार्वजनिक बिदाको दिन गरेको कामको अतिरिक्त भत्ता नपाएकाले आन्दोलनमा उत्रिनुपरेको बताउका छन । चालु आर्थिक बर्षमा चिकित्सक तथा स्वास्थ्यकर्मीहरुले अतिरिक्त भत्ता, जोखिम भत्ता लगायतका सुविधाहरु नपाएको र बेलाबेलामा सम्बन्धित निकायको ध्यानाकर्षण गराउँदा समेत कुनै सुनुवाइ नभए पछि आन्दोलनमा उत्रिनुपरेको अस्पतालमा कार्यरत डाः सुरज नेपालीले बताए ।
अस्पतालको प्रयोगशाला विभागका प्रमुख चन्द्रसिंह डोबालले अतिरिक्त भत्ता र जोखिम भत्ताका बिषयमा सबै निकाय र सामाजिक विकास मन्त्रालयको समेत ध्यानाकर्षण गराइसकेको बताउदै कुनै सुनुवाई नभएको बताए । आफूहरुलाई बेलाबेलामा झुटो अश्वासन मात्रै दिने गरेको तर समस्याको समाधान नभए पछि आकस्मिक बाहेकका सबै सेवाहरु बन्द गर्ने अवस्थामा पुगेको उनले बताए । प्रयोगशाला विभागमा काम गर्ने स्वास्थ्यकर्मीहरुलाई प्रदान गरिने जोखिम भत्ता नपाइएको उनले बताए ।
आफूहरुका समस्याका बिषयमा ठोस पहल र निर्णय नभए आइतबार देखि आकस्मिक बाहेकका सबै सेवा बन्द गर्ने डाः नेपालीले बताए । ९ जना डाक्टर सहित अन्य विभागमा काम गर्ने स्वास्थ्यकर्मी तथा कर्मचारीहरुले अहिले सम्म अतिरिक्त भत्ता र जोखिम भत्ता नपाएको उनले बताउका छन ।
