बैशाख २३ कञ्चनपुर । शुक्लाफाँटा नगरपालिका वडा नम्बर–१० झलारीका गगनराज भट्टको तीनतले घरको छतमा ठड्याइएको युनाइटेड टेलिकम युटिएलको टावर जोखिमयुक्त अवस्थामा रहेको छ । मोबाइल सेवा प्रदान गर्न १४ वर्षअघि घरधनीसँग १० वर्षको सम्झौता गरी निर्माण गरिएको टावरको मर्मत सम्भार नहुँदा जोखिम बढेको हो ।
छ हजार पाँच सय मासिक भाडा दिनेगरी २५ मिटर अग्लो टावर निर्माण गरिएको घरधनी भट्टले बताए । उनले प्रत्येक वर्ष १० प्रतिशत भाडा रकमवृद्धि गरेर दिने सहमतिका साथ टावर निर्माण गरिएको १४ वर्ष भए पनि सुरूका तीन वर्षपछि कम्पनी सम्पर्कविहीन भएको जानकारी दिए ।
उनका अनुसार टावर राखेदेखि मर्मतसम्भार नहुँदा टावरका नटबोल्ट खुकुलो भएर जोखिम बढेको बताउदै उनले अर्थिङ गर्न राखिएको तार चोरी भएको बताए । चट्याङ पर्ने सम्भावना पनि उत्तिकै रहेको बताउदै उनले हावाहुरीको समयमा त टावर निकै हल्लिने गरेकाले बताए । बजार क्षेत्रका तीन घरसहित सडकमा हिँड्ने यात्रुलाई पनि कतिबेला के हुने हो भन्ने चिन्ता भएको भट्टले सुनाए ।
लामो समयदेखि कम्पनीबारे सोधपुछ गर्दा कार्यालय र सम्बन्धित कोही व्यक्ति नभेटाए पछि जिल्ला प्रशासन कार्यालयलाई लिखित जानकारी गराउँदा पनि समाधान हुन नसकेको उनले बताए । टावरसँगै घरमा भाडामा लिएको एउटा कोठामा दुईवटा वातानुकूलित एसी र ८० भन्दा बढी ब्याट्री अलपत्र अवस्थामा रहेको उनले बताए ।
टावरका लागि प्रयोग भइरहेको विद्युत्को महसुल तीन लाख पुग्दा पनि भुक्तानी नभएकाले नेपाल विद्युत् प्राधिकरणले विद्युतलाइन समेत काटिदिएको उनले जानकारी गराए ।
