बैशाख २२ धनगढी । कैलालीको सुख्खडमा बैशाख २८ गते देखी जिल्ला लिग फुटबल प्रतियोगिता हुने भएको छ । शनिबार कैलालीको घोडाघोडीमा पत्रकार सम्मेलनको आयोजना गर्दै प्रतियोगिताको तीव्र तयारी भइरहेको जानकारी गराइएको छ । कैलाली जिल्ला लिग फुटबल संघको आयोजना र घोडाघोडी क्लबको स्थानीय आयोजनामा हुने प्रतियोगिता वैशाख २८ गते देखी ज्येष्ठ १२ गते सम्म सञ्चालन हुने महासचिव ललित मिश्रले जानकारी दिए । घोडाघोडीमा उनले बताए ।
अखिल नेपाल फुटबल संघ एन्फाको दीर्घकालीन फुटबल खेलको विकासको लागि प्रतियोगिता आयोजना हुन लागेको उनले बताए । प्रतियोगितामा जिल्लाका ए डिभिजनका ७, बी डिभिजनका ६ र क्वालिफायर्सका ७ टिम गरि २० टिमको सहभागी रहने महासचिव मिश्रले जानकारी दिए । २८ गते देखी प्रत्येक दिन ३ खेल खेलाइने उनले जानकारी गराए । कैलालीमा पहिलो पटक जिल्ला लिग फुटबल प्रतियोगिता विजेताहरूको लागि पनि पुरस्कारको व्यवस्था गरिएको उनले बताए ।
ए डिभिजन लिगको विजेता क्लवले ७५ हजार र दोस्रो हुने क्लवले ३७ हजार ५ सय पुरस्कार पाउने उनले बताए । त्यस्तै बी डिभिजनको प्रथम हुने टिमले ५० हजार तथा दोस्रो हुने टिमले २५ हजार पुरस्कार पाउने उनले जानकारी गराए । जिल्ला लिग फुटबल प्रतियोगिताको लागि शनीबार ट्रफि पनि सार्वजनिक गरिएको छ ।
राष्ट्रिय फुटबल टिमका पूर्व कप्तान हरि खड्काले प्रतियोगिताको ट्रफि सार्वजनिक गरेका हुन् । ट्रफि सार्वजनिक गर्दै उनले घोडाघोडी नगरपालिकाका मेयर खडक रावत, प्रवक्ता घनश्याम ओझा र स्थानीय आयोजक घोडाघोडी क्लबका होम तामाङलाई ट्रफि हस्तान्तरण गरेका थिए ।
ट्रफि सार्वजनिक कार्यक्रममा घोडाघोडी नगरपालिका प्रमुख खडक रावतले खेलकुदका गतिविधि बढाउन नगरपालिकाले सक्दो सहयोग गर्ने बताए । पूर्व कप्तान खड्काले मोफसलमा फुटबलप्रतिको आकर्षण लोभलाग्दो भएको बताए । उनले सरकारले खेलकुद मैत्री नीति बनाउनु पर्नेमा जोड दिए । कैलाली जिल्ला लिग फुटबल सघका अध्यक्ष अनिल मल्लले घोडाघोडीको हुने लिग प्रतियोगिता अहिले सम्मकै उत्कृष्ट हुने बताए ।
