फागुन ०१ डडेल्धुरा । डडेल्धुराको आलिताल गाउँपालिकाकी एक जना १२ वर्षीया बालिका पटक पटक आफन्तबाटै बलात्कृत भएकी छिन् । उपचारका लागि अस्पताल पुगेपछि बालिका बलात्कारको सिकार भएको घटना बाहिर आएको हो । उपचारका लागि अस्पताल पुगेकी बालिका आफन्त र गाउँकै एक युवाबाट बलात्कृत हुनु परेको खुलेको प्रहरीले जनाएको छ ।
आइतबार उपचारका लागि आफन्त सहित पर्शुराम नगरपालिकाको जोगबुडा अस्पताल पुगेकी बालिकाको उपचारमा संलग्न चिकित्सकले बालिकामाथि बलात्कार भएको आशंका गरेपछि प्रहरीलाई खबर गर्दा घटना बाहिरिएको हो । प्रहरीले अनुसन्धान गर्दा बालिका पटक पटक बलात्कारको सिकार भएको रहस्य खुलेको जिल्ला प्रहरी कार्यालय डडेल्धुराका सूचना अधिकारी प्रहरी निरीक्षक कुसुम नायकले बताए ।
गत वर्ष भदौमा काका नातापर्नेबाट बलात्कृत भएकी बालिका फेरि गएको माघ ६ गते एक स्थानीय युवकबाट बलात्कृत भएको उनको बयानबाट खुल्न आएको प्रहरीले जनाएको हो । पीडित बालिकाले डर, धम्कीका कारण घटनाबारेमा कसैलाई पनि नभनेको प्रहरीले बताएको छ । अहिले बालिकालाई आफन्तको सहयोगमा जिल्ला प्रहरी कार्यालय पु¥याइएको बताईएको छ ।
पीडित पक्षको जाहेरीका आधारमा बलात्कार गरेको आरोपमा आलितालका २० वर्षीय पुष्कर थापालाई पक्राउ गरी प्रहरीले अनुसन्धान गरिरहेको जिल्ला प्रहरी कार्यालय मुद्दाफाँटका प्रहरी वरिष्ठ नायब निरीक्षक करवीरसिंह ऐरले जानकारी गराए । वृद्ध हजुरबुवा र हजुरआमासँग बस्दै आएकी ती बालिकाका काका नाता पर्ने व्यक्ति भने अहिले भारतमा रहेको बतार्ईएको छ ।
बलात्कारको घटना ढाकछोप गर्न उनी भारत गएको हुन सक्ने प्रहरीले आशङका गरेको छ । बालिकाका आमाबाबु कामका सिलसिलामा भारतमा रहेको बताइएको छ ।
