मंसिर २५ धनगढी । लागूऔषध सहित धनगढीबाट प्रहरीले दुई जनालाई पक्राउ गरेको छ । धनगढी उप महानगरपालिका वडा नम्बर–३ को त्रिनगर पोष्ट अगाडीबाट १ सय ३० मिलिग्राम लागूऔषध खैरो हेरोईन सहित डोटीको केआईसिंह गाउँपालिका वडा नम्बर–१ बस्ने २० वर्षीय निश्चल शाही र केआइसिंह गाउँपालिका वडा नम्बर–२ का २१ वर्षीय मनोज रावललाई आईतवार दिउँसो प्रहरीले पक्राउ गरेको हो ।
जिल्ला प्रहरी कार्यालय कैलालीले भारतबाट नेपाल तर्फ आउदै गरेको अबस्थामा त्रिनगर प्रहरी चौकी कैलालीबाट खटिई गएको प्रहरी टोलीले चेकजाँच गर्दा उनीहरुको साथबाट खैरो हेरोईन फेला पारी दुबै जनालाई पक्राउ गरेको जानकारी गराएको हो । घटना सम्बन्धमा थप अनुसन्धान भईरहेको प्रहरीले जनाएको छ ।
