मंसिर २० डोटी । गरिबीका कारण मुक्त हलिया परिवार कष्टकर जीवन जीउन बाध्य भएका छन् । जीवनको उत्तराद्र्धसम्म अर्काको खेतबारीमा हलो–कोदालो गरेका मुक्त हलिया परिवार कष्टकर जीवन बाँच्न बाध्य भएका हुन । गरिबीका कारण रोग, भोग र ऋणको भारले थिचीएका उनीहरु विरामी हुँदा औषधि उपचार गर्न नसकेर घरैमै थला पर्न थालेका छन ।
दलित समुदायका परिवार सबैभन्दा बढी रोग र भोकले थला पर्नथालेका हुन । डोटीको शिखर नगरपालिका वडा नम्बर–१० का मुक्त हलिया गगने भूल घरमा भित्र–बाहिर गर्न नसक्ने गरी थला परेका छन् । गरिबीका कारण उनले आफ्नो उपचार गर्न समेत सकेका छैनन् । २५ वर्ष अर्काको खेतबारीमा जोतिँदा–जोतिँदै उनका दायाँ हात र खुट्टा नचल्ने भएका छन् ।
सोही वडाकै दिमे भोजको पनि १५ महिना देखि दायाँ शरीर नचल्ने भएको छ । ४० वर्ष हलिया जीवन सतिाएका भोजलाई रोगी ज्यान पाल्न मुश्किल भइरहेको हो । बस्तीमा घरघरै दीर्घरोगी र बिरामी रहेका छन् । तर गरिबीका कारण मुक्त हलिया समुदाय स्थानीय स्वास्थ्यचौकी भन्दा परको अस्पतालमा जान सक्ने अवस्थामा छैनन् ।
स्थानीय सरकार नगर अस्पताल बनाउने योजनामा रहे पनि बजेट अभाव भएको शिखर नगरपालिका डोटीका प्रमुख दीर्घबहादुर बलायरले बताए । आर्थिक रुपमा विपन्नहरुलाई एम्बुलेन्समा छुट सुविधा दिने काम भइरहेको उनले बताए ।
फोहोर व्यवस्थापन नहुँदा बिरामी हुने समस्या बढेको वनलेक स्वास्थ्य चौकी डोटीकी स्वास्थ्यकर्मी यशोदा भाटले बताइन । सेती नदी नजिकै पर्ने बस्तीका अधिकांश बासिन्दा अति विपन्न छन् । उनीहरु रोग र भोकसँग ऋणको भारले समेत थिचिएका छन् ।
