कार्तिक २२ धनगढी । तिहार नजिकीदै गर्दा फूल खेती गरेका किसानको व्यस्तता बढेको छ । फूलहरुको पर्व तिहार नजिकिँदै जाँदा व्यावसायिक रुपमा फूल खेती गरिरहेका कैलालीको धनगढीका किसानको व्यस्तता बढेको हो ।
तिहार नजिकिएसँगै एक दर्जन पूष्प व्यवसायी किसानको बारीमा फूलेका सयपत्री र मखमली फूलको रेखदेखमा व्यस्तता बढेको हो । धनगढीमा ११ महिना देखि प्लाष्टिकको फूल र प्लाष्टिकमा उपमहानगरले प्रतिबन्ध लगाए पछि त्यसको बजार स्थानीय उत्पादनले लिन थालेको छ ।
धनगढीमा प्लाष्टिकका झोला पोलिथिन समेत विक्रीवितरण गर्न प्रतिबन्ध छ । तिहारमा यस वर्ष फूल अभाव नहुने गरी दर्जनौ किसान फुल उत्पादनमा लागेका छन् । स्थानीय किसानले धनगढीमा सयपत्री फूल उत्पादन गरेका छन् । फूल उत्पादनमा धनगढीलाई आत्मनिर्भर बनाउने योजना अनुसार दुई दर्जन बढी किसानले फूल खेती सुरु गरेका छन् ।
यो वर्ष दुई कट्टामा फूल खेती गरेका धनगढी उपमहानगरपालीका वडा नम्बर–१२ जुगेडाका प्रतापसिंह बिष्टले अर्को वर्षबाट दुई बिघा जग्गामा फूलखेती गर्ने योजना बनाएको बताए । त्यसैगरी धनगढी उपमहानगरपालीका वडा नम्बर–६ मटियारीमा सुशीला बिष्ट र शंकरसिंह बिष्टले यो वर्ष डेढ बिघा जग्गामा पुष्पखेती गरेका छन् ।
धनगढी उपमहानगरपालिकाले दिएको पुष्पखेती सम्बन्धी तालिम लिएका बिष्ट दम्पतीले डेढ बिघा जग्गामा मखमली र सयपत्री फूल रोपेका छन् । धनगढी उपमहानगरपालीका वडा नम्बर–१२ जुगेडा डी गाउँकी आशा पन्त मिश्रले गत वर्षबाट फूल खेती गर्न थालेकी छन ।
गत वर्ष २० हजारको मखमली र ६० हजारको सयपत्री फूल बिक्री गरेकी मिश्रले यो वर्ष डेढ कट्टामा कलकत्ते, स्थानीय र कर्मा पाँच सय ५५ जातको सयपत्री फूल लगाएको बताईन । त्यसैगरी धनगढी उपमहानगरपालीका वडा नम्बर–१२ सी गाउँकी कृतिका चन्दले पनि पाँच कट्टामा दुई हजार फूलका बिरुवा लगाएकी छन् । चन्दको यो वर्ष ८ टन फूल उत्पादन गर्ने लक्ष्य रहेको छ ।
धनगढी उपमहानगरपालीका वडा नम्बर–१३ अम्बिका टोलका पुष्करसिंह बिष्टले ११ कट्टा जग्गामा पुष्पखेती गरेका छन् । बिष्टले ६ हजार बिरुवाबाट ६ टन फूल उत्पादन गर्ने लक्ष्य लिएका छन ।
उपमहानगरले गत जेठमा दिएको पुष्पखेती सम्बन्धी तालिम र अहिले उत्पादित फूलको बजारीकरण गर्न सहयोग गर्ने बताए पछि अन्य किसान जस्तै पुष्कर पनि उत्पादन भएको फूल बिक्री हुनेमा ढुक्क छन् । तिहार, विवाह, पूजा आजा सहितका कार्यका लागि धनगढीका किसानले फूलको कुनै अभाव नहुने गरी उत्पादन गरेका छन् ।
