असोज २० बझाङ । भूकम्प पीडितहरुले भत्किएका घर पुनः निर्माण गरिदिन आग्रह गरेका छन् । मंगलबारको भूकम्पले बझाङका थुप्रै घर भत्किए पछि भूकम्प पीडितहरुले भत्किएका घर पुनः निर्माण गरिदिन आग्रह गरेका हुन । सदरमुकाम चैनपुर आसपास केन्द्र विन्दु भएर सयौं पटक भूकम्पका पराकम्प गइसकेका छन । भूकम्प गएको पाँच दिन भइसक्दा पनि पीडितहरूले सरकारको तर्फबाट कुनै पनि राहत नपाएको गुनासो गरेका छन् ।
भूकम्प पीडित कलक धामीले खाना गाँउका दाजुभाइ सँगै मागेरै खान सकिने बताउदै घर निर्माण गर्न सक्ने अवस्था नभएकाले घर निर्माण गरिदिन आग्रह गरेका छन । प्रदेश सरकारले आवास पुनः निर्माण गरिदिए सहज हुने बताउदै धामीले भत्किएको घरमा बस्न नसकिने भएकाले अहिले छिमेकी दाईको घरमा परिवार सारेको बताए । उनले राहत सबैले दिने गरेको बताउदै बस्नका लागि घर नभएपछि घरबनाई दिन आग्रह गरे । त्यसैगरी अर्का भूकम्प पीडित दीपक धामीले भूकम्पले घर भत्किएको र बस्न नहुने भए पछि आफन्तको घरमा बस्दै आएको बताउदै सरकारले घर निर्माण गरिदिए ठूलो राहत मिल्ने बताए ।
अर्का पीडित गोपाल धामीले सम्पत्तिको नाममा भएको झुपडी भूकम्पले तहसनहस पारिदिएको बताउदै अहिले छिमेकीहरूको घरमा आश्रय लिनु परेको बताए । अस्थायी रुपमा भए पनि टहरा निर्माण गर्न तथा एक छाक खान र एकसरो लगाउने लुगाको व्यवस्था गरिदिन उनले आग्रह गरे । भूकम्प पीडितलाई सरकारी क्षेत्रबाट प्रदान गरिने राहत नआइपुगेका कारण उनीहरू समस्यामा परेको भूकम्प पीडितले बताएका छन ।
जिल्लामा भूकम्पले पुर्याएको क्षति बारे जानकारी लिई प्रधानमन्त्री तथा मन्त्रीहरूको टोली शुक्रबार राजधानी फिर्ता भएको छ । भूकम्प प्रभावित क्षेत्र निरीक्षण तथा अवलोकन गर्न बझाङ पुगेका प्रधानमन्त्री पुष्पकमल दाहाल प्रचण्डले भूकम्पले निम्त्याएको पहिरोमा परी मृत्यु हुने परिवारलाई तत्काल २ लाख राहत दिने, आवासन दिएका छन भने घर निर्माण गर्न ५० हजार रुपैयाँ उपलब्ध गराउने बताएका छन । भूकम्पबाट प्रभावित अन्य परिवारलाई राहतस्वरूप परिवार संख्याको आधारमा मापदण्ड बमोजिम १५ देखि २० हजार तत्काल राहत खर्च व्यवस्था गरिने घोषणा गरेका छन् ।
त्यसैगरी सुदूरपश्चिम प्रदेशका मुख्यमन्त्री कमल शाहले पनि भूकम्प प्रभावित क्षेत्र निरीक्षण तथा अवलोकन गर्न चार दिन देखि बझाङमै रहेका छन । शनिबार मुख्यमन्त्री शाहले बुंगल नगरपालिका वडा नंम्बर २ का भूकम्प पीडितसँग भेटघाट गरेका छन् । भेटमा मुख्यमन्त्री शाहले प्रदेश सरकारले राहतको प्याकेज ल्याउने घोषणा गरेका छन् । मुख्यमन्त्री शाहले भूकम्प प्रभावित सबै जिल्लाको अवलोकन पछि प्रदेश सरकारले पीडितहरूको माग सम्बोधन गर्ने बताए ।
