असोज ११ काठमाडौं । नेपाल कम्युनिष्ट पाटी माओवादी केन्द्रका सुदूरपश्चिम प्रदेश उपाध्यक्ष कृष्ण बडुवाल (महेश)को निधन भएको छ । जनयुद्धको क्रममा सुर्खेत जेल ब्रेक गरेका बहादुर योद्धाको निधन भएको हो । माओवादी केन्द्रको तीन महिने रुपान्तरण अभियानको क्रममा डोटीमा खटिएका बडुवाल स्वास्थ्यमा समस्या आए पछि गृहजिल्ला कैलाली फर्किएर सामान्य उपचार गराउँदै आएका थिए ।
स्वास्थ्यमा सुधार नभए पछि थप उपचारका लागि भारतको लखनउ लैजाँदै गर्दा उनको बाटोमै निधन भएको पारिवारिक स्रोतले जानकारी गराएको छ । २०७१ साल असोज २० गते डोटीको कटकटे भन्ने स्थानमा भएको बस दुर्घटनामा परी बडुवालकी श्रीमती भागीरथी बडुवाल र छोरा जेनिथ बडुवालको निधन भएको थियो । उक्त बस दुर्घटनामा २९ जनाको मृत्यु ज्यान गएको थियो ।
निमोनियाले थलापर्दै गए पछि उपचारका लागी उनलाई काठमाडौंमा लैजान नेपालगञ्ज एयरपोर्टसम्म लगीएको भए पनि हवाईजहाजका कर्मचारीहरुले धेरै उचाइबाट उड्न ुपर्ने भएकाले बिरामीलाई झन् समस्या हुने भन्दै लैजान नमानेको पारिबारीक स्रोतले जानकारी गराएको छ । त्यसपछि हेलिकप्टरको प्रबन्ध गर्न खोज्दा पनि नसके पछि एम्बुलेन्स मार्फत् भारतको लखनउ लैजाँदै गर्दा उनको बाटोमै मृत्यु भएको पारीबारीक स्रोतले जानकारी गराएको छ ।
हेलिकप्टरको व्यवस्था गरिदिन धेरै नेताहरुसंग र गृह मन्त्रालयमा पनि आग्रह गरीएको भए पनि कसैले वास्ता नगरेका कारण माओवादी केन्द्रले सुदूरपश्चिमको होनहार, असल र कर्मठ नेता गुमाएको छ । बडुवाल सुदूरपश्चिम प्रदेशमा जनसम्बन्ध राम्रो भएका नेताको रुपमा परिचत थिए । महेश बडुवाल २०६४ सालको संविधानसभा सदस्य भगतबहादुर बडुवालका भाइ हुन् ।
