असोज ०८ बाजुरा । बाजुरामा भाइरल ज्वरोको प्रकोपले दुई जनाको मृत्यु भएको छ । बाजुराको खप्तडछेडेदह गाउँपालिका वडा नम्बर–२ माँटेसागुमा भाइरल ज्वरोका कारणले दुई जनाको मृत्यु भएको हो । भाइरल ज्वरोले गाउँ नै प्रभावित भएको र दुई जनाको मृत्यु भएको स्थानीय दीर्घबहादुर शाहीले जानकारी दिए ।
४९ वर्षीया सौरादेवी बुढा र ६२ वर्षीय कुलबहादुर शाहीको मृत्यु भएको उनले जानकारी गराए । बुढाको चार दिन पहिला र शाहीको आइतबार राति मृत्यु भएको उनले बताए । गाउँमा रहेका १ सय ६० बढी घरमा सबै बिरामी परेको उनले बताए । भाइरल ज्वरोले पूरै गाउँ नै प्रभावित बनेको स्थानीय गणेशबहादुर शाहीले बताए ।
गाउँमा भाइरल ज्वरो फैलिएको खबर पाए पछि स्वास्थ्यकर्मीको टिम पठाउन लागेको स्वास्थ्य कार्यलय बाजुराका निमित्त प्रमुख महेश चन्दले बताए । खप्तडछेडेदह गाउँपालिकाबाट दुई जना स्वास्थ्यकर्मी पठाइसकेको र जिल्ला स्वास्थ्य कार्यालयबाट औषधि सहितको टोली पठाउन लागेको चन्दले बताए ।
गाउँपालिका अध्यक्ष दीलबहादुर रावतले स्वास्थ्यकर्मी टोली प्रभावित क्षेत्रमा गइसकेको जानकारी गराए ।