पौष १२ धनगढी । कैलालीमा नक्कली नोट, बाघको हड्डी र जडिबुडी सहित पाँच जनालाई प्रहरीले पक्राउ गरेको छ । धनगढी उप महानगरपालिका वडा नम्बर –४ बसपार्क र वडा नम्बर १३ को राजपुरबाट उनीहरुलाई प्रहरीले पक्राउ गरेको हो ।
साल्ट ट्रेडिङ कपर्नेरेशन अगाडी नक्कली मुद्राको कारोबार भइरहेको विशेष सूचनाका आधारमा एक हजारका चार नोटसहित चुरे गाउँपालिका वडा नम्बर ६ का ५५ वर्षीय लालबहादुर साउँदलाई पक्राउ गरिएको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक वेदप्रकाश जोशीले बताए ।
उनकाअनुसार अनुसन्धानका क्रममा एक हजार दरका थप १ सय ३८ नोट सहित अन्य चार जनालाई पक्राउ गरिएको हो। राजपुरस्थित एस एस होटलमा डेरा गरी बसेका दार्चुलाको लेकम गाउँपालिका वडा नम्बर ६ का ३३ वर्षीय लिलाधार मिश्र, डोटीको शिखर नगरपालिका वडा नम्बर १० का ३० वर्षीय करनसिंह धामी, १९ वर्षीय टेकेन्द्र धामी र बडिकेदार गाउँपालिका वडा नम्बर १ बस्ने ५० वर्षीय मोहन सिंह बोहरालाई प्रहरीले पक्राउ गरेको उनलदे जानकारी गराए ।
राजपुरमै डेरा गरेर बस्ने धामीको कोठा खानतलासी गर्दा पलङ खटियाको सिरानीमुनि लुकाएर राखेको अवस्थामा १ सय ३८ थान नक्कली नोट, जेब्रा झोलामा बाघको जस्तो देखिने करीब साढे ५ किलो जती अस्थीपंजर हड्डी र प्लाष्टिक भित्र लुकाएको अवस्थामा प्रतिबन्धित जडिबुडी पनि बरामद गरिएको प्रहरी नायब उपरीक्षक जोशीले बताए । उनीहरुलाई नियन्त्रणमा लिएर थप अनुसन्धान भइरहेको उनले जानकारी गराएका छन ।
