बैशाख ०३ धनगढी । निर्वाचन आयुक्त डाः जानकी तुलाधरले स्थानिय तहको निर्वाचनलाई निष्पक्ष र भयरहित वातावरणमा सम्पन्न गर्न मिडियाको भूमिका महत्वपूर्ण भएको बताउनु भएको छ । शनिवार धनगढीमा आयोजित स्थानीय तह निर्वाचन सम्बन्धी मिडिया अभिमुखीकरण कार्यक्रममा निर्वाचन आयुक्त डाः तुलाधरले यस्तो बताउनु भएको हो ।
आयुक्त डा तुलाधरले सङ्घीय शासन प्रणालीमा जनताको सबै भन्दा नजिकको सरकार स्थानीय तह भएकाले वैशाख ३० गते हुन लागेको निर्वाचनलाई स्वतन्त्र, निष्पक्ष, विश्वासिलो र भयरहित ढङ्गले सम्पन्न गराउन सबैको साझा दायित्व भएको बताउनु भयो ।
उनले संविधानले तोकेको जिम्मेवारी पूरा गर्न आयोग प्रतिवद्ध रहेको बताउदै हरेक स्थानीय तहमा कार्यालय स्थापना भइसकेकाले पत्रकारले आचारसंहिता उल्लङ्घनका घटनालाई निगरानी गर्नुपर्ने बताउनु भयो । उनले आममतदातालाई निर्वाचनमा सहभागिता गराउन आवश्यक रहेको बताउदै मत बदर हुन नदिन मतदाता शिक्षालाई प्रभावकारी रुपमा अघि बढाउन सरोकारवाला पक्ष अघि बढ्नु पर्ने जानकारी गराउनु भयो ।
त्यसैगरी प्रेस काउन्सिल नेपालका सदस्य हरिप्रसाद जोशीले सञ्चार जगत र पत्रकारले पालना गर्नु पर्ने आचारसंहिताको बारेमा प्रस्तुति गरेका थिए । उनले सबै राजनीतिक दलसंग खुला र तटस्थ रहेर सूचना सम्प्रेषण गर्न पत्रकारलाई आग्रह गरेका थिए । त्यसैगरी उनले मत बदर सङ्ख्या घटाउन मतदाता शिक्षाको रुपमा काम गर्न पत्रकारलाई आग्रह समेत गर्नु भयो ।
उनले निर्वाचनमा सञ्चारको भूमिका मतदाता, आयोग र दलबीच पुलको काम गर्ने भएको बताए । त्यसैगरी आयोगका उपसचिव सूर्यप्रसाद अर्यालले मतपत्रको बारेमा जानकारी गराउनु भयो । उनले स्थानीय तहको निर्वाचन निर्देशिका अनुसार मतपत्रमा चुनाव चिन्ह राखिएको जानकारी गराउनु भयो ।
उनले छ नम्बरसम्म राष्ट्रिय मान्यता प्राप्त दलहरुको चुनाव चिन्ह र २४ देखि स्वतन्त्र उम्मेदवारका लागि चुनाव चिन्ह राखेर मतपत्र छपाइ भएको जानकारी गराउनु भयो । उनले कैलालीका लागि दुई लहरको चुनाव चिन्ह रहेको मतपत्र रहने जानकारी गराए । सुदूरपश्चिम प्रदेशमा १६ लाख ३२ हजार १ सय ५० मतदाता र दुई हजार १ सय ३ वटा मतदान केन्द्र रहेको जानकारी गराईएको छ ।
