बैशाख ०३ कञ्चनपुर । झारफुकका क्रममा एक जना महिलाको मृत्यु भए पछि प्रहरीले धामीझाँक्री सहित ७ जनालाई पक्राउ गरेको छ ।
कञ्चनपुरको बेदकोट नगरपालिका वडा नम्बर ६ मुसेपानीमा धामीझाँक्रीको कुटपिटबाट महिलाको मृत्यु भएको आशंकामा प्रहरीले उनीहरुलाई पक्राउ गरेको हो । शुक्रबार राति झारफुकका क्रममा कुटपीटबाट ४२ वर्षीया रञ्जुला साउँदको मृत्यु भएको स्थानीयले आरोप लगाएका छन् ।
केही दिनदेखि बिरामी परेकी साउँद शुक्रबार साँझ जेठानी कमलाको घरमा धामीझाँक्री आएपछि झारफुकका लागि पुगेकी र सोही क्रममा उनको मृत्यु भएको जिल्ला प्रहरी कार्यालय कञ्चनपुरले जनाएको छ ।
प्रहरीले धामीझाँक्रीद्वय भीमदत्त नगरपालिका वडा नम्बर ७ का धर्मानन्द भट्ट र भीमदत्त नगरपालिका वडा नम्बर १ बाराकुण्डाका नारायणदत्त भट्ट , जेठानी कमला सहित ७ जनालाई नियन्त्रणमा लिएको जनाएको छ । घटनाका विषयमा थप अनुसन्धान भइरहेको प्रहरीले जानकारी गराएको छ ।
