वैशाख ०२ धनगढी । नयाँ वर्षको अवसरमा आयोजना गरिएको प्रथम राष्ट्रिय मुख्यमन्त्री वनदेवी युवा क्लब महिला गोल्डकप फुटबल प्रतियोगिताको तयारी पूरा भएको छ । आयोजक वनदेवी युवा क्लबले पत्रकार सम्मेलन गरी महिला गोल्डकपको तयारी पूरा भएको जानकारी गराएको हो ।
वैशाख ३ गते देखि १० गते सम्म धनगढी स्थित रङ्गशालामा गोल्डकपको आयोजना गरिएको क्लबका अध्यक्ष सुसन जोशीले जानकारी गराए । प्रतियोगितामा विभागीय टिम सहित ८ वटा क्लबको सहभागिता रहने जानकारी गराउदैै अध्यक्ष जोशीले गोल्डकपको विजयी टिमले ट्रफी सहित नगद ५ लाख र उपविजेताले ट्रफी सहित २ लाख ५० हजार रुपैयाँ पुरस्कार राशी प्राप्त गर्ने बताए ।
त्यसैगरी म्यान अफ दी म्याचलाई ५ हजार र विभिन्न विद्याका उत्कृष्ट खेलाडीलाई १० हजार र प्रतियोगिता भरी उत्कृष्ट हुने खेलाडीलाई नगद ५० हजार रुपैयाँ प्रदान गरिने क्लबका अध्यक्ष जोशीले बताए ।
धनगढी स्थित रङ्गशालामा आयोजना हुने प्रतियोगिता दिउँसो अत्यधिक गर्मिहुने भएकोले पहिलो पटक रात्रिकालीन हुने जानकारी गराउदै उनले महिला गोल्डकप सञ्चालनका लागि करिब १ करोड रुपैयाँ खर्च लाग्ने बताए । भोलि देखि सुरु हुने महिला गोल्डकपको टाइसिट समेत सार्वजनिक गरिएको छ भने भोलिको पहिलो खेल विभागीय टिम नेपाल पुलिस क्लब र चन्द्रपुर नगरपालिका रौतहटका बिच हुने जानकारी गराईएको छ ।
