बैशाख ०२ धनगढी । घाँटी छिनालेर हत्या गरी रूखमा बाधीएको अवस्थामा शव भेटीएका कैलालीको जानकी गाउँपालिका वडा नम्बर–९ अमरावतीका अर्जुन दासको हत्यामा सम्लग्न चार जनालाई प्रहरीले पक्राउ गरेको छ ।
घटना भएको झण्डै तीन महिना पछि नेपाल प्रहरीले भारतबाट उनीहरूलाई पक्राउ गरेको हो ।
हत्याको घटना अनुसन्धानका लागि मनोज भण्डारी, सुमित साउद, दिलीप दास र बम बोहरालाई भारतमा लुकेर बसेको अवस्थामा प्रहरीले पक्राउ गरिएको प्रहरीले जनाएको हो । पुसको पहिलो साता दासको घाँटी रेटेर टाउको छिनालेर रूखमा बाँधिएको अवस्थामा जंगलमा शव भेटीएको थियो ।
स्थानीय अमरावती सामुदायिक वनको जंगलमा नग्न अवस्थामा घाँटी रेटेको अवस्थामा दासको शव फेला परेको थियो ।
दासको हत्याका मुख्य अभियुक्त मनोज भण्डारी भएको प्रहरीले जनाएको छ । हत्या पछि मनोजले एक जनालाई फोन गरेर दासको हत्या गरेको अडियो सार्वजनिक भएको थियो । भण्डारीले भारतबाटै हत्यारा हौँ पक्राउ गरेर देखा भन्दै भिडियो सार्वजनिक गर्दै प्रहरीलाई चुनौती दिएका थिए ।