चैत्र २७ धनगढी । आगामी स्थानीय तहको निर्वाचनका लागि कैलालीमा पाँच दलीय गठबन्धन गर्ने सहमती भएको छ । आइतबार बसेको बैठकले निर्वाचन क्षेत्र, २०७४ सालको मतपरिणाम, संगठन संरचनाको प्रभाव, नयाँ घोषणापत्र लगायतलाई आधार मान्दै गठबन्धन गर्ने सहमति भएको हो ।
नेपाली काँग्रेस कैलालीका सचिव केशव मिश्रले वडातह देखि नै १३ वटै स्थानीय तहमा गठबन्धन गर्ने सहमति भएको जानकारी गराए । सचिव मिश्रले १३ वटै स्थानीय तहमा दाबी रहेको बताए ।
त्यसैगरी नेकपा माओवादी केन्द्रका प्रदेश अध्यक्ष हरि ज्ञवालीले काँग्रेसको माग दाबीका आधारमा आफूहरुले स्थानीय तहमा दाबी गर्ने प्रतिक्रिया दिएको बताएका छन । उनले माओवादी केन्द्रले २०७४ सालमा विजयी भएका दुई वटा स्थानीय तह भजनी नगरपालिका र कैलारी गाउँपालिकामा नछोडने बताएका छन । बैठकमा नेकपा एकीकृत समाजवादी पार्टीले पाँच वटा स्थानीय तहमा आफ्नो दाबी गरेको छ । एसले गोदावरी, गौरीगंगा, घोडाघोडी, लम्कीचुहा नगरपालिका र चुरे गाउँपालिकामा दाबी गरेको हो ।
यस्तै, जनता समाजवादी पार्टी र राष्ट्रिय जनमोर्चाले स्थानीय तहमा कुनै दाबी गरेका छैनन । राष्ट्रिय जनमोर्चा पार्टीले स्थानीय तहको नगर प्रमुख तथा उपप्रमुखमा दाबी नगरेपनि गठबन्धनमा आफ्नो सहभागिता जनाउन केही स्थानीय तहको वडामा उम्मेदवार बनाउन माग गरेको बताईएको छ ।
बैठकमा एकीकृत समाजवादीका प्रदेश अध्यक्ष दीर्घ सोडारी,कैलाली जिल्ला अध्यक्ष भैरव रावल, माओवादी केन्द्रका प्रदेश अध्यक्ष ‘अखण्ड’, कैलारी गाउँपालिका अध्यक्ष लाजुराम चौधरी, काँग्रेसका तर्फबाट उपसभापति भीम बडुवाल, सचिव मिश्र, जनमोर्चाबाट जगतराज जोशी र जसपाबाट होरीलाल चौधरीको सहभागीता रहेको थियो ।
