चैत्र २२ धभनगढी । कैलालीमा साढे दुई लाख बालबालिकालाई टाइफाइड विरुद्धको खोप लगाइने भएको छ । अभियान सञ्चालन गरेर विद्यालयहरुमा बालबालिकालाई टाइफाइड विरुद्धको खोप लगाईने भएको हो ।
जिल्ला स्वास्थ्य कार्यालय कैलालीले केही पालिकाले आज बुधबार देखि खोप अभियान सञ्चालन गर्न लागेको जानकारी गराउदै केही पालिकाले चैत २५ गतेबाट सञ्चालन गर्ने तयारी गरेको जनएको छ । जिल्ला स्वास्थ्य कार्यालयका प्रमुख लालबहादुर धामीले बाल बालिकालाई टाइफाइड रोगबाट जोगाउनका लागि खोप दिन लागिएको बताउदै १५ महिना देखि १५ वर्षमुनिका बाल बालिकालाई खोप लगाईने जानकारी गराउनु भयो ।‘प्रत्येक विद्यालयमा खोप अभियान सञ्चालन हुने जानकारी गराउदै उनले कैलालीमा पालिकाहरुले उपलब्ध गराएको तथ्याङ्क अनुसार टाइफाइड विरुद्धको खोप लगाउन पाइने उमेर समूहका बाल बालिकाको सङ्ख्या दुई लाख ४९ हजार रहेको जानकारी गराउनु भयो ।
टाइफाइडको सङ्क्रमण १५ वर्षमुनिका बाल बालिकालाई सबैभन्दा बढी हुने भएकाले सरकारको नीति अनुसार टाइफाइड विरुद्धको खोप अभियान सञ्चालन गर्न लागिएको उनले जानकारी गराए । खोप लगाइ सकेपछि कतिपय बाल बालिकालाई खोप लगाएको ठाउँमा रातो हुने, दुख्ने, हल्का ज्वरो आउने, बिविरा आउने जस्ता असर देखिन सक्ने बताउदै उनले असर देखिएमा नआत्तिन र गम्भीर असर देखा परेमा स्वास्थ्य संस्थामा सम्पर्क गर्न अनुरोध गर्नु भयो ।
नेपाल सरकारले वैशाख १५ गतेसम्म यो अभियान सञ्चालन गर्नु पर्ने समय सीमा तोके पनि विद्यार्थीको परीक्षालाई मध्यनजर गरेर एक हप्तासम्म टाइफाइड विरुद्धको खोप अभियान सञ्चालन हुने प्रमुख धामीले बताउनु भयो । अभियान सफल पार्नका लागि कैलालीमा दुई हजार जनशक्ति खटाइने जमनकारी गराउदै उनले हरेक विद्यालयमा एक स्वास्थ्यकर्मी, एक जना महिला स्वास्थ्य स्वयम् सेविका र एक जना विद्यालयका शिक्षिका अभियानमा खटीने जानकारीगराउनु भयो । कार्यालय प्रमुख धामीले बाल बालिकालाई एक पटक मात्रै टाइफाइड विरुद्धको खोप दिए पुग्ने समेत जानकारी गराए ।