फागुन ३० धनगढी, कैलालीको गोदावरी नगरपालिका वडा नम्बर ३ चौकीडाँडाँमा वादी समुदायले निमार्ण गरेका घर जलाएको भन्दै मुख्यमन्त्री तथा मन्त्रिपरिषद्को कार्यालयमा धर्ना दिइएको छ। केही दिन अगाडि बडिमालिका सामुदायीक वन छेउमा अतिक्रमण गरेर बनाइएका घर भत्काएर जलाइएको भन्दै उनीहरुले धर्ना दिएका हुन्।
स्थानीय केशब दुलाल वादीका अनुसार घरमा कोही नभएको समयमा वनका कर्मचारीले घरमा आगजनी गरेका हुन्। उचि व्यवस्था नहुँदासम्म बस्न दिन आग्रह गरे पनि बेवास्ता गरिएको उनले आरोप लगाए। यता डिभिजन वन कार्यालय कैलालीका प्रमुख केशव पराजुलीका अनुसार सुरुमा सडक छेउमा बसेका वादी समुदायले सामुदायीक वन क्षेत्र कब्जा गर्न खोजेका कारण घर भत्काएर जलाइएको बताए।
‘सामुदायिक वनले पटकपटक अतिक्रमण हटाउन सूचना गर्दा पनि अटेरी गरेपछि घर भत्काइएको हो,’ उनले भने। सडक किनारामा बनाइएका घरलाई भने नभत्काइएको उनले बताएका छन्। पूर्वपश्चिम राजमार्गमा वन क्षेत्रमा निर्माण गरिएका १२ घर भत्काइएको बताइएको छ।
