फागुन २५ बैतडी । एमालेले बैतडीको शिवनाथ गाउँपालिकाका उपाध्यक्ष कुस्मा चन्दलाई कारवाही गरेको छ । एमालेले उपाध्यक्ष चन्दलाई पार्टीको साधारण सदस्य समेत नरहने गरी कारवाही गरेको हो ।
मंगलबार नेकपा एमालेले जारी गरिएको प्रेस विज्ञप्तीमा राष्ट्रियसभाको निर्वाचनमा अन्तर्घात गरेकाले साधारण सदस्य समेत नरहने गरी कारबाही गरेको उल्लेख गरिएको छ ।
२०७४ सालको स्थानीय तहको निर्वाचनमा एमालेबाट उपाध्यक्षमा निर्वाचित चन्दले पार्टीको हित विपरीत काम गरेको भन्दै उनलाई कारबाही गरिएको विज्ञप्तीमा उल्लेख गरिएको छ ।
गत माघ १२ गते भएको राष्ट्रियसभाको निर्वाचनमा स्थानीय तहका पाँच जना प्रमुख÷उपप्रमुखले अन्तर्घात गरेको निष्कर्ष निकाल्दै एमालेको सुदूरपश्चिम प्रदेश कमिटीले जिल्लालाई छानविन गरी कारबाही गर्न दिएको निर्देशन बमोजिम पदीय आचरण र भूमिका निर्वाह नगर्ने र वेवास्ता गर्दै हिड्ने, सामाजिक सञ्जालमा पार्टीको नीति, नेतृत्व बिरुद्ध जाने र बिरोधी पार्टीसँग साठगाठ गरी पदीय आचरणको दुरुपयोग गरेको पाईएकोले उनलाई कारबाही गरिएको जिल्ला अध्यक्ष सुरेन्द्र पाल र सचिव चक्र कार्कीद्वारा हस्ताक्षरित विज्ञप्तीमा उल्लेख गरिएको छ ।
त्यस्तै पार्टीलाई बुझाउनुपर्ने लेबी समेत नबुझाएको, पार्टीको हित विपरीत काम गरेको र स्पष्टीकरण सोध्दा समेत नदिएकोले चन्दमाथि कारवाही गरिएको विज्ञप्तीमा उल्लेख गरिएको छ ।
नेकपा एमालेबाट कारबाहीमा परेकी चन्दले भने एमालेलाई सामन्तवादीको संज्ञा दिएकी छन् । एमालेले साधारण सदस्य समेत नरहने गरी कारवाही गरेपछि उनले सामाजिक सञ्जाल फेसबुक मार्फत आफ्नाका लागि आजको दिन ऐतिहासिक भएको बताएकी छन् । उनले आफूले सामन्तवादीहरुको शोषणबाट मुक्ती पाएको दिन भन्दै सामाजिक सञ्जालमा स्टाटस लेखेकी छन् ।
