फागुन २० बाजुरा प्रधानमन्त्री रोजगार कार्यक्रम बाजुरामा आफन्त र कार्यकर्ता छनौट गरिएको पाईएको छ ।
स्थानीय तहका जनप्रतिनिधिहरूले राजनीतिक आस्थाका आधारमा प्रधानमन्त्री रोजगार कार्यक्रममा आफन्त र कार्यकर्ता छनौट गरिएको पाईएको हो । जनप्रतिनिधिले आफन्त र पार्टी प्रति आस्था राख्नेलाई मात्र छनौट गर्दा वास्तविक गरिबहरू कायैक्रमबाट बञ्चित हुँदै आएका छन् ।
बाजुराको खप्तड छेडेदह गाउँपालिकामा प्रधानमन्त्री रोजगार कार्यक्रमका लागि सूची तयार पार्दा यथार्थ गरिबलाई छनौट नगरी शिक्षक कर्मचारी र ठेकेदारका परिवारलाई वडाका जनप्रतिनिधिहरूले छनौट गरेको स्थानीयले बताएका छन ।
खप्तड छेडेदह गाउँपालिका वडा नम्बर ६ का जनप्रतिनिधि तथा कर्मचारीले यथार्थ गरिबलाई नभइ आस्था र आफन्तको आधारमा शिक्षक, ठेकेदारका परिवारलाई गरिबको सूचीमा राखेर छनौट गरेको स्थानीय राइभान धामीले जानकारी गराए ।
उनले जनप्रतिनिधि र कर्मचारीले गरिबहरूलाई छनौट नगरी जागिरवाला र पावरवालाका आफन्तलाई छनौट गरेको जानकारी गराए । गरिबहरूका लागि काम गरेर खाने वातावरण नै नभएको उनले बताए ।
खप्तड छेडेदह गाउँपालिका वडा नम्बर ६ आटिचौरका वास्तविक गरिब भन्दा धेरै जसो शिक्षक र उनका परिवार भित्रका सदस्य छनौट भएको जानकारी गराउदै उनले मष्टेश्वरी मावि डोगडीका प्रधानाध्यापक मंगल धामीकी श्रीमती सिर्जना धामीलाई पनि रोजगार कार्यक्रमका लागि छनौट गरिएको बताए ।
त्यसैगरी ब्रह्मदेव निम्न माध्यमिक विद्यालयका प्रधानाध्यापक रमेश नाथकी श्रीमती लक्ष्मीदेवी नाथको नाम पनि प्रधानमन्त्री रोजगार कार्यक्रमको सूचीमा रहेको उनले बताए ।
ब्रह्मदेव निम्न माध्यमिक विद्यालयका शिक्षक गोरे नाथकी श्रीमती नामसरा नाथ, शिक्षक अर्जुन नाथकी श्रीमती चन्दकला नाथ, शिक्षक चन्द नाथका छोरा सन्तोष नाथ, शिक्षक सारा नाथका श्रीमान् गोरे नाथ योगी, शिक्षक सत्यदेवी नाथका श्रीमान् नन्द नाथ योगी पनि रोजगार कार्यक्रमका लागी छनौट गरिएको स्थानीयले जानकारी गराए ।
गाउँपालिकामा कार्यरत पोषण संयोजक शेरबहादुर बुढाकी श्रीमती मना बुढा, सोही वडा कार्यलयमा कार्यरत लेखापाल शंकर नाथकी श्रीमती पार्वती कुमारी गिरीलाई पनि छनौट गरिएको बताईएको छ ।
त्यसैगरी ठेकेदार बुद्ध बुढाकी आमा माता बुढालाई पनि रोजगार कार्यक्रममा छनौट गरिएको छ । यथार्थ गरिब तथा रोजगारीका लागि भौतारिरहेका गरीबहरुलाई रोजगारीबाट बञ्चित गरी शिक्षक तथा पालिकाका कर्मचारीका परिवारका सदस्यलाई मात्र रोजगार कार्यक्रममा छनौट गरिएको ्् पाइएको आटिचौरका स्थानीय सन्तोष नाथले जानकारी गराए । वडाध्यक्ष कुम्भ नाथले आफ्ना कार्यकर्तालाई मात्र रोजगारमा छनौट गरेको भन्दै स्थानीय आक्रोशित भएको उनले जानकारी गराए ।
वडाध्यक्ष नाथले एकपक्षीय ढंगले रोजगारमा छनौट गरेको स्थानीय लालवीर नाथले गुनासो गरे । उनले प्रधानमन्त्री रोजगार कार्यक्रममा पहिला र पछि छनौटमा परेका ब्याक्तिहरुको सूची माग्दा नपाएको पनि उनले जानकारी गराए ।
वडाध्यक्ष नाथ र खप्तड छेडेदह गाउँपालिकाका रोजगार संयोजक लोकराज जोशीले सूची नै गायव गरेको उनले जानकारी गराए ।
