फागुन १९ बैतडी । सौताको हत्यामा संलग्न ५५ वर्षीया नारू महरालाई कारागार चलान गरिएको छ ।
जिल्ला अदालत बैतडीले महरालाई हत्यामा संलग्न रहेको ठहर गर्दै पुर्पक्षका लागि कारागार चलान गरेको हो ।
हत्या आरोपमा पक्राउ परेकी दोगडाकेदार गाउँपालिका वडा नम्बर २ मल्लागाउँकी नारू महरालाई पुर्पक्षका लागि कारागार चलान गरिएको बैतडीका प्रहरी प्रवक्ता प्रहरी निरीक्षक दर्शन खड्काले जानकारी गराए ।
गत माघ १८ गते उनकी सौता ४० वर्षीया चन्द्रा महरा घर नजिकैको बाँझो घरमा मृत अवस्थामा भेटिएको प्रहरी निरीक्षक खड्काले जानकारी गराउनु भयो । त्यसपछि हत्यामा संलग्न रहेको आशंका रहेकोले उनलाई नियन्त्रणमा लिएको प्रहरी निरीक्षक खड्काले जानकारी गराउदै नारूले हत्यामा आफ्नो संलग्नता रहेको स्वीकार गरेको प्रहरी निरीक्षक खड्काले जानकारी गराउनु भयो ।
मृतक चन्द्राको घाँटी र मुखमा चोट रहेको बताउदै उनले नारूले घटना हुनु पहिला पनि चन्द्रालाई कुटपिट गर्ने गरेको प्रहरी अनुसन्धानबाट खुलेको जानकारी गराउनु भयो ।
उनका श्रीमानको यस अघि नै मृत्यु भइसकेको बताउदै प्रहरी निरीक्षक खड्काले मृतक चन्द्राका एक छोरा र एक छोरी रहेको जानकारी गराउनु भयो ।