फागुन ०१, काठमाडौं । नेकपा माओवादी केन्द्रका अध्यक्ष पुष्पकमल दाहालले सरकारले ल्याएको प्रस्ताव सभामुखले रोक्न नमिल्ने बताएका छन् ।
उनले प्राइम टाइम्स टेलिभिजनमा पत्रकार ऋषि धमलासँग कुरा गर्दै भनेका छन्, “सभामुखको मत हुन सक्छ तर सरकारले प्रस्ताव ल्याएको अघि बढाउनुपर्छ । उहाँले रोक्न मिल्दैन । मान्नै नसक्ने हो भने अग्नि सापकोटाले राजीनामा दिएर हिँड्नुपर्छ । सरकारले ल्याएको प्रस्ताव रोक्नै मिल्दैन । साह्रै चित्त बुझेन भने राजीनामा दिएर छाडिदिनुपर्छ । सरकारले ल्याएको प्रस्ताव रोक्नुहुँदैन ।”
उनले अहिलेको अवस्थामा एमसीसी परिमार्जनविना पारित गर्न नसकिने स्पष्ट पारे । तर प्रधानमन्त्रीले यही अवस्थामा प्रस्ताव ल्याएमा आफूहरु सरकारमा नरहने पनि स्पष्ट पारे ।
“हाम्रो चाहना सहमति होस् भन्ने हो । तर प्रधानमन्त्रीले चाहनुभयो भने टेबुल हुन्छ,” उनले भने, “सहमति र संशोधनबिना टेबुल नगरौँ भन्ने हाम्रो मत हो । तर प्रधानमन्त्रीले टेबुल गर्छु भन्नुभयो भने हुन्छ । तर हामी पक्षमा जान सक्दैनौँ । त्यसपछि विरोधमा बहस गर्छौँ ।
त्यो अवस्थामा के हुन्छ भने हामी नैतिकरुपले सरकारमा बस्न मिल्दैन । हामीले गठबन्धन छोड्नुपर्ने अवस्था आउन सक्छ । यहाँ अर्को ढंगले समीकरण बन्न पनि सक्छ ।”
उनले त्यसअघि सभामुखले पनि सर्वदलीय बैठक राखेर निकास निकाल्ने प्रयास गर्ने बताए ।
“त्यस्तो अवस्थामा हामी विपक्षमा मतदान गर्छौँ त्यो अवस्थामा हामी सरकारमा रहँदैनाँै,” उनले भने, “हामी अहिले कुनै हालतमा पक्षमा उभिदैनौँ । विरोधमा रहन्छौँ ।”
एमसीसीको बारेमा प्रधानमन्त्री शेरबहादुर देउवाको धारणा अहिले जे थियो त्यही रहेको र आफूहरुको धारणा पनि पहिलेदेखि अहिलेसम्म एउटै धारणा रहेको बताए ।
उनले त्यसबेला गठबन्धन जोगाउन पनि कूटनीतिकरुपमा पत्र लेख्नुपरेको बताए । उनले एमसीसी पारित गर्न भनेर गठबन्धन नबनाएको पनि बताएका छन् ।
