माघ २७ धनगढी सुदूरपश्चिममा प्रदेश लोकसेवा आयोगले विज्ञापन खोल्ने भएको छ । बिहीवार बसेको प्रदेश मन्त्रिपरिषद्को बैठकले नीतिगत अस्पष्टता हटाउने निर्णय गरेपछि प्रदेश लोकसेवा आयोगले निर्वाचन अगाडि नै विज्ञापन खोल्ने भएको हो ।
प्रदेश सरकारका प्रवत्ता आन्तरिक मामिला तथा कानूनमन्त्री पूर्णा जोशीले मन्त्रिपरिषद् बैठकले संघीय सरकारको स्वीकृत दरबन्दी अनुसार प्रदेशको मन्त्रालय र मातहतका निकायमा रिक्त रहेका दरबन्दीमा कर्मचारी भर्ना गर्न लोकसेवालाई लेखी पठाउने निर्णय गरेको जानकारी गराउनु भयो ।
उहाँले अबको एक साता भित्रै सबै मन्त्रालयले माग आकृति फाराम भरेर मुख्यमन्त्री तथा मन्त्रिपरिषद्को कार्यालय मार्फत आयोगलाई बुझाउने बताउनु भयो ।
त्यसैगरी लोकसेवा आयोगका सचिव दुर्गादत्त बिष्टले माग आकृति फाराम भरेर आइसके पछि क्यालेन्डर बनाएर विज्ञापन खोलिने बताउनु भयो ।
आयोगले पटक पटक खाली रहेका दरबन्दी पदपूर्तिका लागि विवरण पठाउन स्थानीय तह र प्रदेश सरकारलाई आग्रह गर्दै आएको थियो । सुदूरपश्चिम प्रदेशमा २३ सय बढी स्वीकृत दरबन्दी रहेकोमा झण्डै ४५ प्रतिशत रिक्त रहेका छन ।
