माघ २५ कञ्चनपुर । राष्ट्रिय भूमि आयोग कञ्चनपुरको कार्यालय उद्घाटन गरीएको छ । आयोगले मंगलबार कार्यालयको उद्घाटन गरेको हो । आयोगका अध्यक्ष देबेन्द्र ढुङ्गानाले कार्यालयको उद्घाटन पछि मंगलबार देखि आयोगले काम सुरु गरेको जानकारी गराउदै यस भन्दा अगाडीकोे आयोगले संकलन गरेका आवेदन रुजु गर्ने र छुटेका ब्यक्तिहरुको फेरि आवेदन संकलन गर्ने गरी काम सुरु गरिएको बताउनु भयो ।
यस अघि एमाले कञ्चनपुरका सह इन्चार्ज कमला बोहराको नेतृत्वमा रहेको आयोग विघटन गरिए पछि एक महिना अघि मात्रै गठन गरिएको आयोगका अध्यक्ष नेकपा माओवादी केन्द्रका नेता ढुङ्गानाले आयोगले कार्यालय स्थापना गरी व्यवस्थित रुपमा आयोगको कामकाज सुरु गर्न लागेको जानकारी गराए । कार्यालय स्थापना पछि निस्सा बाँडिएको स्थानीय तहमा जग्गा रेखाङ्कन सुरु गरिने अध्यक्ष ढुङ्गानाले बताउनु भयो ।
‘निवेदन सकंलन भई स्थानीय तहले निस्सा वितरण गरेको ठाउँमा जग्गा रेखाङ्कन सुरु गरिने बताउदै उनले ‘पहिलो चरणमा सम्झौता भएका स्थानीय तहमा मात्रै काम गरिने बताउनु भयो । यस अघिको आयोगले संकलन गरेको लगतमा धेरै जना छुटेको बताउदै उनले छुटेकाहरुको लगत संकलन पनि गरिने बताउनु भयो । आयोगमा आएका गुनासोका आधारमा पनि पुनः निवेदन संकलन कार्य अघि बढाउन लागिएको उनले बताए ।
तत्कालिन प्रधानमन्त्री नेकपा एमालेका अध्यक्ष केपी शर्मा ओली नेतृत्वको आयोगले कञ्चनपुरमा बोहराको अध्यक्षतामा तीन सदस्यीय आयोग गठन गरिएको थियो ।
परमादेशबाट बनेको देउवा नेतृत्वको बर्तमान सरकारले आयोग विघटन गरेपछि अहिले फेरी आयोग गठन गरिएको हो । आयोग को कार्यालय उद्घाटन कार्यक्रममा नेकपा एमाले भीमदत्त नगरका अध्यक्ष हिमाल चन्द, नेपाली काँग्रेसका नेता भीमराज भट्ट, नेकपा समाजबादीका रविन्द्र कुवँर, सहायक जिल्ला अधिकारी अशोक भण्डारी लगायतले आ आफ्ना विचारहरु राखेका थिए ।
