माघ २४ अछाम । अछामको बान्निगढी जयगढ गाउँपालिकामा रहको दर्ना लघु जलविद्युत् आयोजना ७ वर्ष नपुग्दै बन्द भएको छ ।
बान्निगढी गाउँपालिकाको वडा नम्बर ६ दर्नामा रहेको ८३ किलोवाट क्षमताको दर्ना लघु जलविद्युत् ््आयोजनाको कुलो बाढीले बगाए पछि सुरु भएको सात वर्ष नपुग्दै बन्द भएको हो । साढे चार करोडको लागतमा निर्माण भएको लघु जलविद्युत् आयोजनाको एक किलोमिटर सात सय मिटर लामो कुलो मध्ये छ सय मिटर कुलो भत्किएको स्थानीयले बताएका छन ।
बान्निगढी जयगढ गाउँपालिकाका अध्यक्ष राजेन्द्र बहादुर खड्काले आयोजना सञ्चालनका लागि पहल गरेको जानकारी गराउदै त्यसको सुनुवाइ नभएको बताउनु भयो । उनले सुदूरपश्मि प्रदेशका प्रदेस सभा सदस्यले राष्ट्रिय प्रसारण लाइन जोड्ने भएकाले विद्युत् आयोजना सञ्चालन नगर्ने भनेर गएको बताउनु भयो । राष्ट्रिय प्रसारण लाइन पनि जडान भएको बताउदै गाउँपालिकाका अध्यक्ष खड्काले उपभोक्ताहरु मारमा परेको बताउनु भयो ।
उनले विद्युत् सहकारी मार्फत सञ्चालन हुँदै आएको राष्ट्रिय प्रसारण लाइनले उपभोक्ताहरुलाई निकै मारमा पारेको बताउँदै त्यसको छिट्टै समाधान गर्न आवश्यक रहेको बताउनु भयो । उनले विद्युत चुहावट निकै बढेको बताउदै उपभोक्तासँग पैसा उठाएकै भए पनि प्राधिकरणलाई एक वर्षमा २८ लाख तिर्नुपर्ने देखिएको जानकारी गराउनु भयो ।
गाउँपालिकाका अध्यक्ष खड्काले अस्थायी सम्झौता गरेर बिजुली बत्ती बालिएको बताउदै २८ लाख बक्यौता तिर्न नसक्दा तीन पटक विद्युतलाइन काटिएको बताउनु भयो । उनले गाउँपालिकाले जिम्मा लिएर अहिले फेरी जडान गरिएको बताउनु भयो ।
उपभोक्ताले लघुजलविद्युत् आयोजना सञ्चालनमा हुँदा न्यूनतम ५० रुपैयाँ र प्रतियुनिट सात रुपैयाँका दलले विद्युत् महसुल तिर्ने गरेको बताउदै अध्यक्ष खडकाले राष्ट्रिय प्रसारण लाइन जोडिए पछि उपभोक्ताहरुले न्यूनतम एक सय रुपैयाँ र प्रतियुनिट १५ रुपैयाँका दरले विद्युत् महसुल तिर्दै आएको बताउनु भयो । लघु जलविद्युत् आयोजना सञ्चालनमा हुँदा पाँच जनाले रोजगारी पाएको बताउदै जलविद्युत् आयोजना बन्द हुँदा २५ महिनाको तलब समेत अझै नपाएको विद्युत् आयोजनामा काम गर्दै आएका झनक थापाले बताए ।
समितिले माघ ५ गते देखि कर्मचारीहरुलाई अवकाश दिइसकेको बताउदै थापाले २५ महिनाको तलब नपाएको गुनासो गरे । जागिरबाट अवकाश दिए पनि काम गरेको पैसा पनि पटक पटक माग गर्दा पनि त्यसको सुनुवाइ नभएको उनले बताए । तीन जनाको बीमा बापतको ५७ हजार रुपैया पनि समितिले नतिरेको उनले दुखेसो गरे । साबिकको दर्ना गाविसका ६ सय ६२ र कालागाउँ गाविसका ४ सय ५० घरधुरीले सस्तोमा विद्युत उपभोग गर्न पाएकोमा बन्द भए पछि उनिहरुले राष्ट्रिय प्रसारण लाईनबाट विद्युत उपभोग गरेबाफत चर्को महशुल बुझाउदै आएका छन ।
