माघ २४ कञ्चनपुर । वैदेशिक रोजगारीका लागि मलेशिया गएका एक जना नेपालीको सडक दुर्घटनामा मृत्यु भएको छ ।
कञ्चनपुरको शुक्लाफाँटा नगरपालिका वडा नम्बर १२ दुवाहाका २५ बर्षिय राजेन्द्र बहादुर चौधरीको मृत्यु भएको हो । मलेशियाको जोहार बारुमा काम गर्दै आएका चौधरीको मोटरसाइकलमा जाँदै गर्दा दुर्घटनामा भएर मृत्यु भएको हो । उनको शव मलेशियाको जोहार बारुस्थित अस्पतालमा राखिएको बताइएको छ ।
काकाको छोराको विवाहका लागि केही दिनमै घर आउँदै छु भन्ने सन्देश दिएका अविवाहित चौधरी मलेशियाको मेट्रोनिक इन्डस्ट्रिज एसडिएम डिएसडी जोहार बारुमा ६ वर्षदेखि कार्यरत भएको पारीबारीक स्रोतले बताएको छ । घर आउनलाई केही सामान समेत किनेको छु भनेर मलेशियाबाट राजेन्द्रले फोनमा कुरा गरेको छिमेकी बुद्धिराम चौधरीले
बताए । फोनमा कुरा भएको केही दिनमै मृत्युको खबर सुनेको बताउदै उनले परिवार र छिमेकी मृत्युको खबर सुनेपछि शोकमा डुबैको बताए ।
उनको शव नेपाल ल्याउन काममा मलेशिया पठाउने दिपप्रोटेड मेनपावर कम्पनी, श्रमविभाग र नेपाली दूतावासमा पहल भइरहेको चौधरीले जानकारी गराए ।
