माघ २१ धनगढी
हिमपातका कारण अवरुद्ध दशरथचन्द राजमार्ग नेपाली सेनाले खुलाएको छ । बिहीबार देखि परेको हिउँ पन्छाएर अवरुद्ध सतबाँझ–गोठलापानी खडक शुक्रबार मध्याह्न पछि सेनाले खुलाएको हो ।
सडकखण्डको हिउँ पन्छाउन हनुमानध्वज गुल्मबाट उपसेनानी बालाराम बुढाथोकीको नेतृत्वमा ६० जना नेपाली सेना, नेपाल प्रहरी र सशस्त्र प्रहरीको टोली खटिएको गुल्मपति सेनानी खिलबहादुर रानाले जानकारी गराउनु भयो ।
राजमार्ग खुलाउन बिहानै देखि सेनाको टोली खटिएको र पछि नेपाल प्रहरी र सशस्त्र प्रहरीको टोली पनि हिउँ पन्छाउन पुगेको उनले बताउनु भयो ।
हिउँ पन्छाए पछि उक्त सडक खण्डमा रोकिएका सवारीसाधन र यात्रु गन्तव्यतिर लागेको हनुमानध्वज गुल्मका गुल्मपति सेनानी रानाले जानकारी गराउनु भयो । सतबाँझ–गोठलापानी सडकखण्ड सञ्चालनमा आए पनि यहाँका अन्य राजमार्ग अझै अवरुद्ध भएको बैतडीका प्रहरी प्रवक्ता, प्रहरी निरीक्षक दर्शन खड्काले जानकारी गराउनु भयो ।
अनारखोली, खोडपे क्षेत्रमा परेको हिउँले दशरथचन्द राजमार्ग, सतबाँझ, धरमघर क्षेत्रको हिउँले महाकाली राजमार्ग र श्रीभावर, ढोल्यामोड क्षेत्रको हिउँको जयपुथ्वी राजमार्गको यातायात सेवा अझै ठप्प रहेको प्रहरी निरीक्षक खड्काले जानकारी गराउनु भयो ।
हिउँ पर्ने क्रम नरोकिएकाले सञ्चालनमा आएको दशरथचन्द राजमार्ग अझै अवरुद्ध हुने सम्भावना रहेको उनले बताए । बिहीबार दिउँसो देखि राजमार्ग बन्द हुँदा यात्रु अलपत्र परेको उनले बताउनु भयो । उनले काठमाडौं, धनगढी, महेन्द्रनगरबाट आएका र दार्चुला, बैतडीबाट छुटेका यातायातका साधन बीच बाटोमै रोकिएको बताउनु भयो ।
वर्षा र हिमपातले चिसो बढेकाले स्वास्थ्य सावधानी अपनाउन स्वास्थ्यकर्मीले सुझाब दिएका छन् । चिसोले बालबालिका तथा वृद्धवृद्धालाई बढी असर गर्ने भएकाले उनीहरुको ख्याल गर्न आग्रह गरिएको छ । यहाँ तेस्रोपटक हिमपात भएको बताइएको छ । यस अघि माघ दोस्रो हप्ता र गत पुसमा पनि हिमपात भएको बताईएको छ ।
