माघ २० बझाङ । मानसिक सन्तुलन ठीक नभएका एक जनाले नेपाल टेलिकमको टावरमा तोडफोड गर्दा बझाङका तीनवटा स्थानीय तहमा फोन र इन्टरनेट सेवा प्रभावित भएको छ ।
सोमबार दिउँसोे मष्टा गाउँपालिक वडा नम्बर–६ दौलेमेला भकुण्डे सामुदायिक वनमा रहेको नेपाल टेलिकमको टावरमा चार्जिङमा राखिएका ५७ वटा सोलार प्यानल, २४ वटा ब्याट्री, तार ५ किलोवाट र अन्य उपकरणमा मष्टा गाउँपालिका वडा नम्बर–५ का मानसिक सन्तुलन ठीक नभएका स्थानीय भरत ओखेडाले टेलिकमको टावरमा तोडफोड गर्दा मष्टा गाउँपालिका, तल्कोट र साइपाल गाउँपालिकाका अधिकांश ठाउँमा फोन र इन्टरनेट सेवा पूर्णरूपमा प्रभावित भएको हो । तोडफोड गर्ने ओखेडालाई प्रहरीले खोजी गरे पनि फेला पार्न नसकेको र उनको मानसिक सन्तुलन सही नभएको स्थानीयबाट बुझिन आएको जिल्ला प्रहरी कार्यालय बझाङका प्रमुख तथा डिएसपी ज्ञानबहादुर विष्टले बताए ।
ओखेडाले यसअघि पनि गाउँमा रहेका मठमन्दिर भत्काउने, सार्वजनिक स्थलमा नराम्रो व्यवहार गर्ने र मानिसलाई देख्नासाथ ढुङ्गा हान्ने गरेको स्थानीयले बताएका छन् । तोडफोड भएको टावर कहिले सञ्चालनमा आउने भन्ने यकिन भन्न नसकिने नेपाल टेलिकमको शाखा कार्यालय बझाङले जनाएको छ ।
