माघ ११ धनगढी
तीन जना राष्ट्रियसभा सदस्यका लागि हुने निर्वाचनका लागी सुदूरपश्मिमा दुईवटा मतदान केन्द्र निर्धारण गरिएको छ ।
भोली बुधबार हुने राष्ट्रियसभा सदस्यको निर्बाचनका लागि सुदूरपश्चिम प्रदेशसभाको परिसरमा दुई वटा मतदान केन्द्र निर्धारण गरिएको सहायक निर्वाचन अधिकृत प्रेमराज भट्टले जानकारी गराउनु भयो ।
उनले भोली हुने राष्ट्रियसभा सदस्य निर्वाचनका लागि प्रदेशसभा परिसरमा दुई वटा मतदान केन्द्र निर्धारण गरेको जानकारी गराउदै ‘५२ जना प्रदेशसभा सदस्यका लागि मतदान केन्द्र ‘क’ नामाकरण गरेर व्यवस्थापन गरिएको बताउनु भयो । त्यसैगरी स्थानीय तहका प्रमुख–उपप्रमुख तथा अध्यक्ष–उपाध्यक्ष गरेर १ सय ७५ जनाका लागि मतदान स्थल ‘ख’ निर्धारण गरेको सहायक निर्वाचन अधिकृत भट्टले जानकारी गराउनु भयो । उनले प्रदेशसभा परिसरमा हुने मतदानका लागि मतपत्र छपाइको काम सकेर सुरक्षित रुपमा राखिएको जानकारी गराउदै भोली बिहान ९ बजे देखि ३ बजेसम्मका लागि मतदानको कार्यसूची तय गरिएको जानकारी गराउनु भयो । सुदूरपश्चिम प्रदेशमा राष्ट्रियसभा सदस्यका लागि सत्तारुढ गठबन्धन र प्रमुख प्रतिपक्षी दल नेकपा एमाले चुनावी प्रतिस्पर्धामा रहेका छन् ।
गठबन्धनको तर्फबाट खुल्लामा नेपाली कांग्रेसका नारायण मिश्र, दलितमा माओवादी केन्द्रका जगत पार्की र महिलामा एकीकृत समाजवादी पार्टीकी गरिमा शाहको उम्मेदवारी रहेको छ । त्यसैगरी नेकपा एमालेले खुल्लामा डिल्लीराज भट्ट, दलितमा नरेश बिक र महिलामा सन्तोष कुमारी शर्मा थापालाई उम्मेदवार बनाएको छ । ५२ जना प्रदेशसभा सदस्य रहेको सुदूरपश्चिम प्रदेशसभामा एकीकृत समाजवादीका १४,माओवादी केन्द्रका १३, नेपाली कांग्रेसका १२, नेकपा एमालेका ११, राष्ट्रिय जनता पार्टीका एक र लोकतान्त्रिक समाजवादी पार्टीका एक जना प्रदेशसभा सदस्य रहेका छन् । ८८ वटा स्थानीय तहका १ सय ७५ जना मतदाता रहेकोमा कांग्रेसका ७४ जना मतदाता रहेका छन् भने एमालेका ७१ जना मतदाता रहेका छन् । माओवादी केन्द्रका १७ जना र एकीकृत समाजवादीका १३ जना मतदाता रहेका छन् । मतदानमा सहभागि हुनका लागि सुदूरपश्चिमका पहाडी जिल्लाबाट स्थानीय तहका जनप्रतिनिधिहरु धनगढी पुगिसकेको बताईएको छ ।