माघ ११ बाजुरा,
बाजुराको मार्तडीमा नेपाल विद्युत् प्राधिकरणको राष्ट्रिय प्रसारण लाइन जोडिएको छ ।
नागरिक समाजले तीन दिनसम्म आन्दोलन गर्नाका साथै कार्यालयमा तालबन्दी गरे पछि बाजुरा जिल्लाको सदरमुकाम मार्तडीमा प्राधिकरणको राष्ट्रिय प्रसारण लाइन जोडिएको हो ।
दैनिक छ देखि १० घण्टा सम्म विद्युत् कटौतीको मार खेप्दै आएका सदरमुकाम वासी राष्ट्रिय प्रसारण लाइन जडान भएपछि खुसी भएका छन् ।
माघ ७ गते देखि जडान गरिएको लाइनबाट १० गते साँझ देखि नियमित रुपमा विद्युत् उपलब्ध गराईएको प्राधिकणका कार्यालय प्रमुख ललितकुमार मण्डलले जानकारी गराए । विसं २०४६ सालमा स्थापना भएको बाजुरा साना जलविद्युत् केन्द्रले २०६६ साल देखि विद्युत् उपलब्ध गराउन थालेपछि स्थानीय त्रिवेणी सहकारी संस्थाले २० वर्षका लागि सम्झौता गरेर विद्युत् उपलब्ध गराउँदै आएको बताउदै उनले दुई सय किलोवाट क्षमताको विद्युत्ले मार्तडीमा लोड धान्न नसकेपछि त्रिवेणीले दैनिकजसो विद्युत् कटौती गर्दै आएको जानकारी
गराउनु भयो ।
सदरमुकाम मार्तडीलाई लक्षीत गरेर सोमबार देखि ११ हजार भोल्टेजको लाइन जडान गरीएको कार्यालय प्रमुख मण्डलले जानकारी गराउदै बाजुरामा सबस्टेशन नभए सम्म ११ हजार भोल्टेजको लाइनबाट सेवा विस्तार गरिने र सवस्टेशन निर्माण भइसके पछि ३३ केभिएको लाइन दिनसकिने जानकारी गराउनु भयो ।