माघ १० धनगढी,
धनगढी–अत्तरिया ६ लेन सडकमा ट्रकसँग हायस ठोक्किदा भएको दुर्घटनामा १६ जना घाइते भएका
छन् । इलाका प्रहरी कार्यालय मालाखेतीका प्रमुख, प्रहरी नायब उपरीक्षक नवराज पोखरेलले अत्तरियाबाट धनगढीतर्फ आइरहेको सु.प.प्र ०२ ००१ ख ११६६ नम्बरको हायसले ल ना ४ ख १९१५ नम्बरको ट्रकलाई पछाडिबाट ठक्कर दिँदा पाठक पेट्रोल पम्प नजिक दुर्घटना भएको जानकारी गराउनु भएको हो । हायसले ट्रकलाई पछाडिबाट ठक्कर दिँदा दुर्घटना भएको जानकारी गराउदै दुर्घटनामा हायस चालक गौरीगंगा नगरपालिका वडा नम्बर–९ बस्ने ३५ वर्षीय धर्मराज जोशी, धनगढीकी अम्रिता चन्द, दिपिका जोशी, विमला जोशी, कञ्चनपुर भीमदत्त नगरपालिका वडा नम्बर–१९ की शारदा भट्ट, गोविन्द भट्ट, शुक्लाफाँटा नगरपालिकाका मणी जोशी, रमेश जोशी र पुष्पा भट्ट घाइते भएको बताउनु भयो । त्यसैगरी भारतको लखनउ बस्ने चन्द्री रावत, महेन्द्र रावत, अविजित रावत, रुपन हरिजंग, किशोर हरिजंग, प्रेम कुँवर र रजनी हरिजंग पनि घाइते भएको प्रहरीले जानकारी गराएको छ ।
प्रहरी नायब उपरीक्षक पोखरेलले घाइतेमध्ये चालक जोशी र धनगढीकी विमला जोशीको अवस्था मध्यम रहेको र बाँकीको सामान्य रहेको जानकारी गराउनु भयो । ‘घाइतेको धनगढी र अत्तरियाका विभिन्न अस्पतालमा उपचार भइरहेको प्रहरी नायब उपरीक्षक पोखरेलले बताउनु भयो ।