माघ ५ कञ्चनपुर,
कञ्चनपुरमा एक हजार बेडकोे होल्डिङ सेन्टर निर्माणको कार्य भईरहेको छ ।
गत वैशाख महिनामा नेपाल सरकारको मन्त्रिपरिषद् बैठकको निर्णय बमोजिम नेपाली सेनाले निर्माण गर्ने भनिएको सदरमुकाम महेन्द्रनगरस्थित सालघारी क्षेत्रमा १ हजार जना क्षमताको होल्डिङ सेन्टर निर्माणको कार्य अन्तिम चरणमा पुगेको छ । नेपाली सेना मार्फत् होल्डिङ सेन्टर निर्माणको ठेक्का पाएको हनुमान कन्स्ट्रक्सन प्रालिले सेन्टरको निमार्णको कार्य अन्तिम चरणमा पुगेको जनाएको हो ।
निर्माण कम्पनीका अनुसार हाल बेड फिटिङको काम भईरहेको छ । कम्पनीले होल्डिङ सेन्टरमा विद्युत आपूर्तिको लागि ट्रान्समिटर राख्ने काम पनि सम्पन्न गरी सकेको छ ।
होल्डिङ सेन्टरको नब्बे प्रतिशत भन्दा बढी प्रगती भएको बताईएको छ । सेनाको श्री नम्बर २५ बाहिरी अड्डा भगतपुर ब्यारेकले होल्डिङ सेन्टरको निमार्णको कार्य हेरिरहेको छ । बाहिनीले निर्माण कार्यको अनुगमन तथा सुपरिवेक्षण गर्ने गरेको बताईएको छ । सेनाले विशेष ध्यान दिएर निमार्ण कार्यलाई सहजता गर्ने गरेको बाहिनीले जनाएको छ । २९ करोडमा होल्डिङ सेन्टरको ठेक्का पाएको निर्माण कम्पनीले करिब साढे पन्ध्र करोड रुपैयाँ भुक्तानी लिई सकेको छ । तीन बिगाहा क्षेत्रफलमा निर्माण गरिएको स्थायी होल्डिङ सेन्टरको बाइस वटा अलग अलग ब्लक रहेका छन् । होल्डिङ सेन्टर निर्माण पछि जिल्लामा बढिरहेको कोरोना संक्रमणलाई नियन्त्रण गर्न सहज हुने विश्वास गरीएको छ ।