माघ ५ बाजुरा ,
बाजुराको सदरमुकाम मार्तडीमा विद्युत आपुर्तिको माग गर्दै नागरिक समाज बाजुराले प्रदर्शन गरेको छ । देश लोडसेडिङ मुक्त भएको अबश्थामा सदरमुकाम मार्तडीबासीले दैनिक ८ देखि १० घण्टा लोडसेडिङको मार खेप्नु पर्ने बाध्यताको अन्त्य गर्न नागरिक समाज बाजुराले मंगलबार देखि प्रदर्शन गर्दै आएको हो ।
बुधबार नागरिक समाज बाजुराले अखिल क्रान्तिकारीका बाजुरा अध्यक्ष खेमराज साउँदको नेतृत्वमा विद्युत आपूर्तिको माग गर्दै दुनिहाटबजार, डिआरमष्ट बन कार्यालय हुँदै जिल्ला प्रशासन कार्यालय अगाडी आधा घण्टा धर्ना दिएको छ । जिल्ला प्रशासन कार्यालय बाजुराका प्रमुख जिल्ला अधिकारी उपेन्द्रराज पौडेलले विद्युतको समस्या समाधानका लागि विहिबार सर्वदलीय बैठक बोलाएको र विद्युत समस्याको समाधान नागरिक समाज बाजुराले तत्काल विद्युत समस्याको समाधान नभए थप आनदोलनका कार्यक्रम अगाडि बढाउने नागरिक समाजका अगुवा सुरेन्द्र नाथले बताए ।
राष्ट्रिय प्रशारण लाईन मार्तडीमा पुगेको भए पनि बाजुरा वितरण केन्द्र र त्रिवेणी सहकारीले विद्युत जडानमा चासो नदिएको भन्दै दुवै कार्यालयमा मंगलबार तालाबन्दी गरेको थियो ।
विद्युत समस्याको समाधान नहुन्जेल सम्म कार्यालयमा लगाएका तालाहरू नखोल्ने नागरिक समाजले चेतावनी समेत दिएको छ ।
२०४६ सालमा स्थापना भएको बाजुरा साना जलविद्युत २०६६ सालदेखि त्रिवेणी सहकारीले २० वर्षका लागि लिजमा सम्झौता गरेर संचालन गरिरहेको छ । विद्युतको उत्पादन क्षमता २ सय किलोवाट भएकोले मार्तडीमा माग अनुसारको विद्युत आपुर्ति भने हुन् नसकेको बताईएको छ ।
