माघ ४ कैलाली , कोरोना पोजेटिभ देखिएकाहरु सीमा नाकाबाटै भाग्न थालेका छन् । त्रिनगर भन्सार नाकामा एण्टीजेन परिक्षण गर्दा पोजेटिभ देखिएकाहरु नाकाबाटै भाग्न थालेका हुन् । एण्टीजेन पोजेटिभ देखिएका १५ देखि २० जना दैनिक भाग्न थालेको स्वास्थ्य परिक्षणमा संलग्न स्वास्थ्यकर्मीले जानकारी गराएका छन् ।
भारतबाट फर्केनेको संख्या बढेसँगै कोरोना संक्रमण पुष्टि हुने संख्या पनि तीव्र रुपमा बढी रहेको
छ । भीड बढेका बेला संक्रमण देखिएकाहरु भाग्न थालेको त्रिनगनर नाकाको हेल्थ डेस्कका इन्चार्ज अहेब गणेश साउँदले जानकारी गराए । भीडमा को कतिबेला भागेर जान्छ थाहै नहुने बताउदै उनले भाग्नेहरु सार्वजनिक यातायातमै घर जाने गरेकाले संक्रमण झनै फैलिने खतरा बढेको जानकारी गराए । कतिपय रिपोर्ट आउनु अघिनै र कतिपय रिपोर्ट लिएर भाग्ने गरेको उनले जानकारी गराए ।
एण्टीजेन जाँच गर्ने स्थान नजिकै पोजेटिभ देखिएकालाई तत्काल राख्न त्रिपालको टेण्टभित्र बस्ने व्यवस्था गरिएको बताउदै उनले भारतबाट फर्कनेको भीड बढेका बेला टेण्टको छेउसम्मै परिक्षण गर्नेहरुको लाइन लाग्ने गरेकाले संक्रमितहरु भाग्ने क्रम बढेको उनले जानकारी गराए ।
भारतबाट फर्कनेको घुँइचोले नाकामा व्यवस्थापन अस्तव्यस्त रहेको जानकारी गराउदै उनले भीडमा परिक्षण नगरेर जानेको संख्या पनि उत्तीकै बढि रहेको बताएका छन । सिमा नाकामा सुरक्षाकर्मीको संख्या कम हुँदा भीड व्यवस्थापन गर्न नसकेको बताउदै उनले संक्रमितलाई रोकेर राख्न हम्मेहम्मे भइरहेको जानकारी गराउनु भयो । डेस्कमा भीड व्यवस्थापनमा दुई जनामात्रै सुरक्षाकर्मी खटिने गरेकाले व्यवस्थापनमा समस्या भइरहेको अहेब साउँदले जानकारी गराउनु भयो । दुई जनाले भारतबाट आउनेको लाइन व्यवस्थापन गर्ने कि पोजेटिभ देखिएकालाई रोकेर राख्ने उनले प्रश्न गरे । लाइन व्यवस्थापनमा रेडक्रसका स्वयम् सेवक पनि खटिएका छन् तर धेरैले प्रहरीबाहेक अरुलाई नर्टैने गरेको उनले बताए । कैलाली, कञ्चनपुर घर भएका संक्रमितलाई सम्बन्धित वडाको सिफारिसमा घर पठाउने गरिएको बताउदै उनले त्यसरी जान चाहनेलाई निजि गाडीमा मात्र जान दिने गरिएको जानकारी गराए ।
उनीहरु कसरी गए र घरमा आइसोलेसनमा बसे÷बसेनन् त्यसको जानकारी लिने काम कुनै निकायले नगरेको पाईएको छ । नाकामा भइरहेको लापरबाहीले समुदायमा पनि संक्रमण फैलने जोखिम बढेको स्वास्थ्यकर्मीले बताएका छन ।