बैतडी, बैतडीको सुर्नया गाउँपालिका वडा नम्बर–६ का ३० वर्षीय डम्मर अवस्थीको हत्यामा संलग्न रहेको आशंकामा प्रहरीले थप एक जनालाई पक्राउ गरेको छ । अवस्थीको हत्यामा संलग्न रहेको आशंकामा प्रहरीले सुर्नया गाउँपालीका वडा नम्बर–६ कै ३० वर्षीय नवराज अवस्थीलाई पक्राउ गरेको हो । नियन्त्रणमा लिएका उनीमाथि थप अनुसन्धान भैरहेको बैतडीका प्रहरी प्रवक्ता, प्रहरी निरीक्षक बोधराज ओझाले जानकारी दिए । गत मंसिर १४ गत ेदेखि हराइरहेका डम्मरको शव गत पुस २८ गते घर नजिकैको धुरा जंगलमा १५ फिट गहिरो गुफामा गाडेको अवस्थामा फेला परेको थियो । यस अघि डम्मरको हत्यामा संलग्न रहेको आरोपमा सोही ठाउँका २३ वर्षीय हरिश अवस्थीलाई प्रहरीले पक्राउ गरेको थियो । हरिशले आफू विप्लव माओवादीबाट अपहरणमा परेको नाटक गरेपछि घटनाको पर्दा खुलेको हो । उनले डम्मरको हत्या गरेको स्वीकार गरिसकेका छन् ।