माघ १७ बैतडी । बैतडीमा बालबालिकालाई सोमबार देखि मोडर्ना खोपको दोस्रो मात्रा दिन सुरु गरिएको छ । बैतडीका १२ देखि १७ वर्ष उमेर समूहका बालबालिकालाई मोडर्ना खोपको दोस्रो मात्रादिन सुरु गरिएको हो ।
गत महिना मोडर्नाको पहिलो मात्रा लगाएका बालबालिकालाई दोस्रो मात्रा दिन सुरु गरिएको स्वास्थ्य कार्यालयका सूचना अधिकारी हरिश भट्टले जानकारी गराउनु भयो ।
बैतडीका सबै स्थानीय तहमा मोडर्ना खोपको दोस्रो मात्रा पठाइसकेको सूचना अधिकारी भट्टले जानकारी गराउनु भयो । गत महिना ३२ हजार भन्दा बढी बाल बालिकालाई मोडर्नाको पहिलो मात्रा दिइएको उनले बताउनु भयो । उनले स्थानीय तहले सम्बन्धित विद्यालयसँग समन्वय गरी खोप अभियान सुरु गरिएको बताउनु भयो । प्रत्येक स्थानीय तहका विद्यालयमै र नजिकको स्वास्थ्य संस्थामा खोप केन्द्र राखिएको सूचना अधिकारी भट्टले जानकारी गराउनु भयो ।
खोप लगाउन ३२ हजार डोजको व्यवस्था गरिएको सूचना अधिकारी भट्टले जानकारी गराउनु भयो । जिल्लामा हालसम्म १ लाख ४० हजार २ सय २५ जनाले खोपको पहिलो मात्रा लगाएका छन भने १ लाख ६ हजार २ सय ५२ जनाले खोपको पूर्ण मात्रा लगाएका छन् । कोरोनाका कारण बैतडीमा हाल सम्म १९ जनाको मृत्यु भई सकेको छ ।