माघ १६ धनगढी
सुदूरपश्चिम प्रदेशमा थप ३ सय ३६ जनामा कोरोना भाइरस संक्रमणको पुष्टि भएको छ । स्वास्थ्य निर्देशनालय दीपायलले सार्वजनिक गरेको तथ्यांक अनुसार १ हजार २ सय २५ जनाको एन्टिजेन र ६९ जनाको पीसीआर परीक्षण गर्दा २ सय ३६ जनामा संक्रमणको पुष्टि भएको हो । आईतबार संक्रमण पुष्टि भएका मध्ये ४७ जना भारतबाट फर्केका नागरिक भएको निर्देशनालयले जनाएको छ ।
आईतबार सुदूरपश्चिमका नाका भएर ६ सय ६६ जना स्वदेश फर्केका छन् । निर्देशनालयका अनुसार प्रदेशमा ४ हजार ७ सय ४३ जना सक्रिय संक्रमितको संख्या रहेको छ ।
उनीहरुमध्ये ७९ जनाको मात्रै अस्पतालमा उपचार भइरहेको छ भने अन्य सबै होम आइसोलेसनमा रहेका छन् । यस्तै पछिल्लो २४ घण्टामा कैलालीको सेती अस्पतालमा उपचाररत थप २ जना कोरोना संक्रमितको मृत्यु भएको छ । कैलालीकी एक महिला र कञ्चनपुरका पुरुषको उपचारका क्रममा मृत्यु भएको अस्पतालले जनाएको छ । कैलालीको गौरीगंगा नगरपालिकाकी ६५ वर्षीया महिलाको आइतबार बिहान मृत्यु भएको जिल्ला प्रशासन कार्यालय कैलालीका सूचना अधिकारी शिवराज जोशीले बताए । उनका अनुसार ती महिलाको शनिबार देखि अस्पतालको आइसियूमा राखेर उपचार भइरहेको थियो । यसैगरी कञ्चनपुरको कृष्णपुर नगरपालिकाका ३१ वर्षीय पुरुषको आइतबार बिहान मृत्यु भएको जिल्ला प्रशासन कार्यालय कैलालीले जनाएको छ । शनिबार अस्पताल भर्ना भएका उनको आइसियूका राखेर उपचार भइरहेको थियो ।