माघ १४ बैतडी,
मेलौली नगरपालिकामा कार्यरत केहि कर्मचारीमा कोरोना सङ्क्रमण देखिएपछि अत्यावश्यक बाहेक सबै सेवा बन्द गरिएका छन् । मेलौली नगरपालिकामा कार्यरत पाँच कर्मचारीमा कोरोना देखिएपछि शुक्रबारदेखि अत्यावश्यकबाहेकका सबै सेवा बन्द गरिएका हुन् ।
अर्को सूचना जारी नभएसम्मका लागि अत्यावश्यक बाहेकका सेवा बन्द गरिएका नगरपालिकाका निमित्त प्रमुख प्रशासकीय अधिकृत सपना कार्कीले जानकारी गराउनु भएको छ । एन्टिजेन विधिमार्फत कोरोना परीक्षण गर्दा नगरपालिकामा कार्यरत पाँच कर्मचारीमा सङ्क्रमण पुष्टि भएको पनि उँहाले जानकारी दिनुभयो ।
यसअघि मेलौली नगरपालिकास्थित केशरपुर प्राथमिक स्वास्थ्य केन्द्रमा कार्यरत चार कर्मचारीमा कोरोना पुष्टि भएपछि अत्यावश्यक बाहेकको सेवा बन्द गरिएको जानकारी पनि दिनुभयो । साथै बैतडी जिल्ला अदालतले पनि कर्मचारीमा कोरोना देखिएपछि यही माघ १८ गतेसम्मका लागि अत्यावश्यक बाहेकका सबै सेवा बन्द गरेको छ ।
यसैगरी जिल्ला अस्पताल बैतडीमा हालका लागि दन्त सेवा बन्द गरिएको छ । दन्त सेवा विभागमा कार्यरत चिकित्सक र स्वास्थ्यकर्मीमा कोरोना देखिएकोले अर्को सूचना जारी नभएसम्मका लागि दन्त सेवा बन्द भएको अधिकृत कार्कीले बताएका हुन् ।
कोरोना भाइरस तीव्र गतिमा फैलिन थालेकाले स्वास्थ्यका मापदण्ड अपनाउन र सुरक्षित भई घरमै बस्न जिल्ला प्रशासन कार्यालय बैतडिले आग्रह गरिएको छ ।
